بۇگىنگى ۇكىمەت وتىرىسىندا ق ر ءىىم ورىنباسارى جانات سۇلەيمەنوۆ پرەمەر-مينيستردەن ءسوز ەستىپ قالدى، دەپ حابارلايدى Qamshy.kz اقپارات اگەنتتىگى.
جانات سۇلەيمەنوۆ شقو-داعى سۋ تاسقىنىنا قاتىستى بايانداما جاساپ، ۇكىمەت باسشىسىنا ەسەپ بەرگەن ەدى.
– قۇرمەتتى باقىتجان ءابدىر ۇلى، قازىرگى ۋاقىتتا شقو-دا 400 ءۇي سۋ استىندا قالىپ وتىر. 326 تۇرعىن ۇيدەن سۋ سورىپ الىندى. قازىرگى ۋاقىتتا قاراعاندى وبلىسىندا سۋ باسقان 12 ۇيدەن سۋ تولىعىمەن سورىپ الىندى. كۇشتەر مەن قۇرالدار توبىن كۇشەيتۋ ءۇشىن شقو-عا ىشكى ىستەر ءمينيسترىنىڭ ورىنباسارى ءيليننىڭ باسشىلىعىمەن ءىىم جەدەل توبى جىبەرىلدى. 92 ادام جەكە قۇرامنان، 14 بىرلىك تەحنيكادان، 58 موتوپومپادان جانە 8 ءجۇزۋ قۇرالىنان تۇراتىن كۇشتەر مەن جابدىقتار قوسىمشا جەتكىزىلدى. اۆاريالىق قۇتقارۋ جانە شۇعىل جۇمىستارعا 454 قۇرامنان جانە 203 بىرلىك تەحنيكادان تۇراتىن كۇشتەر جۇمىلدىرىلعان. بايانداما اياقتالدى، - دەدى ىشكى ىستەر ءمينيسترىنىڭ ورىنباسارى.
– دانيال كەنجەتاي ۇلىنىڭ ۇسىنىسىنا بايلانىستى نە ايتاسىز؟ – دەدى پرەمەر-مينيستر.
– ول ماسەلە بويىنشا ءبىز دەمالىس كۇندەرى ۇلتتىق ۇلان ۇشاقتارىمەن وقو، الماتى، پاۆلودار وبلىسىنان قوسىمشا كۇش رەتىندە جەكە قۇرام مەن تەحنيكالار جەتكىزدىك، - دەپ جاۋاپ قاتتى جانات سۇلەيمەنوۆ.
– دۇرىس. جوق بولعاننان كەيىن باسقا وبلىستاردان الىپ وتىرسىز عوي. ال دانيال كەنجەتاي ۇلى ايتىپ وتىر: «نورما بويىنشا وسىنشا بولۋ كەرەك، ال شىن مانىندە وتە تومەن سيفر»، - دەپ. قانداي شارالار جاسالىپ جاتىر مينيسترلىكتىڭ تاراپىنان؟ - دەپ سۇراعىن ناقتىلادى ساعىنتايەۆ.
– رۇقسات بولسا، ول تۋرالى باياندامام، سيفرلارىم جوق، - دەپ كۇمىلجىگەن سۇلەيمەنوۆ پرەمەر-مينيستردىڭ سىنىنا ۇشىرادى.
– بايانداماڭىزعا ول ماسەلە جونىندە جازىپ بەرگەن جوق قوي. سوندا سىزدەر قالاي باسقاراسىزدار؟ بايانداما جازىپ بەرگەندى وقىپ بەرەسىز، جازباسا، جاعدايدىڭ قانداي بولىپ جاتقانىن بىلمەيسىزدەر دە. سوڭىنان كەلىپ وسىنداي جاعدايلارعا دۋشار بولامىز، تەحنيكا جوق، گيدروكومبەنيزون جوق، موتوپومپا جوق. قيىن جاعداي بولسا، كورشى وبلىستاردان سۇراپ الامىز. تۇسىنىكتى، - دەدى باقىتجان ساعىنتايەۆ.
