تەمىرتاۋ قالالىق سوتى ادامنىڭ دەنساۋلىعىنا قاساقانا اۋىر زيان كەلتىرگەن دميتريي ءزيميندى كىنالى دەپ تاپتى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

«دميتريي زيمين قازاقستان رەسپۋبليكاسى قىلمىستىق كودەكسىنىڭ 106-بابى 2-بولىگى 7 جانە 11 تارماقشاسى بويىنشا كىنالى دەپ تابىلىپ، وعان 5 جىل باس بوستاندىعىنان ايىرۋ جازاسى تاعايىندالسىن. قازاقستان رەسپۋبليكاسى قىلمىستىق كودەكسىنىڭ 63-بابىنا سايكەس، زيمينگە بەرىلگەن جازا تاعايىندالعان بارلىق مەرزىمدە پروباسيالىق باقىلاۋ ورناتۋمەن شارتتى دەپ بەلگىلەنسىن»، - دەلىنگەن ۇكىمدە.

سوتتىڭ انىقتاۋىنشا، 2017 جىلدىڭ 24 تامىزىندا زيمين ءوزىنىڭ تانىسىمەن بىرگە ماس كۇيدە بولعان. ءوز ۇيىندەگى بالكوننان ول قۇمدا ويناپ وتىرعان ەكى بالانى كورىپ قالادى. سوت ماتەريالدارىنا سايكەس، ءدال وسى كەزدە ونىڭ قىلمىستىق پيعىلى تۋىنداعان.

«قىلمىستىق پيعىلىن ىسكە اسىرۋ ماقساتىندا زيمين «مر 512» ماركالى پنيەۆماتيكالىق ۆينتوۆكاسىن الىپ شىعىپ، ونى قورعاسىن وقپەن وقتاعان. وسىدان كەيىن ول بالكونىنىڭ تابالدىرىعىنان اتتاپ، دەنساۋلىققا اۋىر زيان كەلتىرۋ پيعىلىمەن قورعاسىن وقپەن بالالاردى اتقان. الايدا وق قۇمعا تيگەن»، - دەلىنگەن سوت ماتەريالدارىندا.

بۇدان سوڭ زيمين ۆينتوۆكاسىن قايتادان قورعاسىن وقپەن وقتاپ، بالالارعا قاراتا اتقان. وسىنىڭ سالدارىنان وق بالانىڭ ءبىرىنىڭ كەۋدەسىنىڭ وڭ جاق تۇسىنا تيگەن. كەۋدەگە تيگەن وق گەمو-پنيەۆموتوراكسپەن بىرگە وكپەگە زاقىم كەلتىرگەن. جاراقات العان بالا اۋرۋحاناعا جەتكىزىلگەن. ال زيمين وقيعا ورنىنان قاشىپ كەتكەن ەدى.