وڭتۇستىك قازاقستان وبلىسى، سارىاعاش اۋدانىندا جەتى جاسار قىز جوعالىپ كەتتى دەپ جازادى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ. بۇل تۋرالى بالانىڭ اناسى اقبوتا كاۋكەشوۆا حابارلادى.

ونىڭ ايتۋىنشا، ءبىرىنشى سىنىپتا وقيتىن ينابات مۇحتارقوجا اقنيەت اۋىلىنداعى ناعاشىلارىنا قىدىرىپ بارعان. ال كەشە، 26 ناۋرىزدا كۇندىزگى ساعات ءبىر مەن ەكىنىڭ اراسىندا تۋىستارى ونى تاپپاي قالعان.

«ءوزىمىز ارىس اۋدانىنا قاراستى قوجاتوعاي اۋىلىندا تۇرامىز. قىزىمىز ناعاشىلارىنا قىدىرىپ بارعان ەدى. سول كۇنى ەسىكتىڭ الدىنا ويناپ جۇرگەن ەكەن. جارتى ساعاتتىڭ اراسىندا جوق بولىپ كەتكەن. ءقازىر ءبارىمىز وسىندا كەلىپ، ىزدەپ جاتىرمىز. قانداي دا ءبىر بولجام دا جاساي الماي وتىرمىز. ەش حابار جوق. اقىل ەسى جاقسى. 2010 جىلى تۋعان، ءبىرىنشى سىنىپتا وقيدى»، - دەيدى اناسى.

تۋىستارى بالانىڭ جوعالعانى تۋرالى ءتارتىپ ساقشىلارىنا دا حابارلاعان. ىزدەستىرۋ جۇمىستارى ءجۇرىپ جاتىر.

«سول كۇنى-اق پوليسياعا حابار بەردىك. ءقازىر ولار دا ىزدەۋ شارالارىن جۇرگىزىپ جاتىر. جەرگىلىكتى ارناعا دا كومەك سۇراپ باردىق»،- دەيدى اقبوتا كاۋكەشوۆا.