قىزىلوردا قالاسىنداعى اتىس سالدارىنان جاراقات العان ازامات وبلىستىق مەديسينا ورتالىعىندا قايتىس بولدى، دەپ حابارلايدى Qamshy.kz اقپارات اگەنتتىگى.

ەسكە سالساق، كەشە قىزىلوردا قالاسى، ايتەكە بي كوشەسىندە اتىس بولدى. اتىس سالدارىنان ەر ادام اۋرۋحاناعا جەتكىزىلگەن. 

«ناۋقاس وبلىستىق مەديسينا ورتالىعىنا اۋىر جاعدايدا جەتكىزىلدى. دەرەۋ قابىلداۋ بولىمىنەن جانساقتاۋ بولىمىنە جاتقىزىلدى. سول مەزەتتە «ءىش قۋىسىنا تەرەڭ وق تيگەن، ىشكى اعزالارى زاقىمدالعان. 4 دارەجەلى گەمورراگيالىق شوك» دەگەن دياگنوز قويىلدى. ناۋقاسقا شۇعىل وتا جاسالدى. الايدا، كورسەتىلگەن رەانيماسيالىق شارالارعا قاراماستان جاراقاتتانعان ازامات 27 ناۋرىز كۇنى كەشكىسىن كوز جۇمدى»،- دەلىندى قىزىلوردا وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنىڭ مالىمدەمەسىندە.

"ءقىىب كەزەكشى بولىمىنە ايتەكە بي جانە جەلتوقسان كوشەلەرىنىڭ قيىلىسىندا  بۇزاقىلىق  ورىن العانى تۋرالى حابارلاما تۇسكەن. وقيعا ورنىنا جەدەل-تەرگەۋ توبى جەتىپ، 7-8 ادامنان قۇرالعان توپتىڭ بۇزاقى ارەكەتى انىقتالدى. ناتيجەسىندە قالانىڭ 1 تۇرعىنى دەنە جاراقاتىمەن وبلىستىق مەديسينالىق ورتالىققا (ومو) جەتكىزىلدى.  اتالمىش دەرەك بويىنشا ق ر قك-نىڭ 259-بابى، 3-بولىگى، "بۇزاقىلىق" فاكتىسى بويىنشا قىلمىستىق ءىس قوزعالدى. قازىرگى تاڭدا، كۇدىكتىلەر، بۇزاقىلىق ارەكەتتىڭ مۇشەلەرى ءقىىب جەتكىزىلدى، تەرگەۋ امالدارى جۇرگىزىلۋدە. تەرگەۋ مۇددەسىنە بايلانىستى مالىمەتتەر جاريا ەتىلمەيدى"، - دەپ مالىمدەگەن بولاتىن ءوىىد باستىعىنىڭ ورىنباسارى ن.اناربايەۆ.