كەمەروۆوداعى قايعىلى جاعدايعا بايلانىستى قالادا ستيحيالىق ميتينگ بولىپ ءوتتى. ميتينگ كەشە جەرگىلىكتى ۋاقىتپەن تاڭەرتەڭگى ساعات 9-دا باستالىپ، 11 ساعات بويى جالعاستى دەپ حابارلايدى ريا نوۆوستيگە سىلتەمە بەرىپ Qamshy.kz اقپارات اگەنتتىگى.

كەيبىر دەرەكتەر بويىنشا ميتينگكە 10،000-عا جۋىق ادام قاتىستى. اشۋلى قالا تۇرعىندارى «زيمنيايا ۆيشنيا» ساۋدا-ورتالىعىندا كوز جۇمعاندار تۋرالى رەسمي دەرەكتەرگە سەنبەيتىنىن جەتكىزدى. ولار شەنەۋنىكتەردەن وزدەرىن ورتالىق الاڭعا عانا ەمەس، ءمايىتحاناعا كىرگىزۋدى تالاپ ەتتى.

ميتينگ بارىسىندا كۋزباسستىڭ گۋبەرناتورى سەرگەي سيۆيليەۆ تىزەرلەپ تۇرىپ، ميتينگكە قاتىسۋشىلاردان كەشىرىم سۇراعان.

ميتينگكە قاتىسۋشىلار جۋرناليستەرگە سۇحبات بەرىپ، شەنەۋنىكتەردىڭ قازا تاپقانداردىڭ ناقتى سانىن جاسىرىپ جاتقانىن كىنالادى. كەمەروۆو قالاسىنىڭ مەرى يليا سەرەديۋك ميتينگكە قاتىسۋشى بەلسەندىلەر توبىن ءمايىتحانالارعا جىبەردى. ءمايىتحانالارعا بارىپ كەلگەن ادامدار جۇرت الدىندا ەسەپ بەردى.

"ءقازىر عانا ءمايىتحانالارعا بارىپ كەلدىك. بارلىق قاباتتاردى، پودۆالدارعا دەيىن قاراپ شىقتىق. تىزىمدە كورسەتىلگەندەي 64 ادامنىڭ ءمايىتىن كورىپ كەلدىك"،-دەدى بەلسەندىلەردىڭ ءبىرى.

ەسكە سالساق، 25 ناۋرىزدا "زيمنيايا ۆيشنيا" ساۋدا-ورتالىعىنىڭ ۇستىڭگى قاباتىندا ءورت تۇتانىپ، عيمارات ورتەنگەن. سالدارىنان 64 ادام كوز جۇمدى دەپ حابارلاندى. ولاردىڭ ىشىندە بالالار دا بار.