«زيمنيايا ۆيشنيا» ويىن-ساۋىق ورتالىعىندا بولعان 31 جاستاعى ميحايل ترۋسوۆ ورتتەن قالاي امان قالعانىن ايتىپ بەردى. الايدا ەكى قىزىنان ايىرىلعان.

قازىرگى ۋاقىتتا ول كەمەروۆو وبلىستىق كلينيكالىق اۋرۋحاناسىندا ەمدەلىپ جاتىر.

سول كۇنى ميحايل ەكى قىزىمەن كينوتەاترعا بارعان. ايەلى ۇيدە قالادى.

«زالدا 30-40 ادام بولعان. ادامدار ءتۇتىننىڭ ءيىسىن سەزە باستادى دا، ەسىككە قاراي جۇگىردى. ءبىراق ەسىك جابىق تۇردى. ال ءورت باستالعانىن زالداعىلارعا ەشكىم ەسكەرتپەگەن»، - دەپ ەسكە الدى ەر ادام ريا نوۆوستي پورتالىنا بەرگەن سۇحباتىندا.

ونىڭ ايتۋىنشا، ادامدار 15 مينۋت بويى كومەك كۇتكەن. ەشكىم كەلمەگەندىكتەن وزدەرى ارەكەت ەتۋگە كىرىسەدى.

«ادامدار قوسالقى ەسىكتەن شىقپاق بولىپ، قۇلپىن جۇلىپ الدى. ءبىراق شىعۋعا قورىقتى، سەبەبى اينالانى ءورت پەن ءتۇتىن جايلاپ العان. ال مەن كومەككە ادام شاقىرۋ ءۇشىن زالدان شىعىپ بارا جاتقان جەرىمدە ەسىمنەن تانىپ قالدىم. قۇدايعا شۇكىر، مەنى بايقاپ قالعان ەكەن. تەلەفونىمنىڭ جارىعى كوزگە تۇسكەن بولۋ كەرەك، مەنى سول جەردەن الىپ شىقتى. جەدەل-جاردەم كولىگىندە ءولىپ كەتەم بە دەپ ويلادىم. ءبىراق وكپەمدى تازالاپ، تىنىس الۋىم قالىپقا كەلە باستادى»، - دەدى ميحايل.

ەر ادامنىڭ قازىرگى جاعدايى ءبىرقالىپتى. ميحايل  وزىنەن باسقا ەشكىمنىڭ زالدان شىعا الماعانىن ايتادى.