ەلىمىزدەگى ويىن-ساۋىق ورتالىقتارى مەن ساۋدا ۇيلەرى سياقتى حالىق كوپ باراتىن نىساندار 2 ساۋىردەن باستاپ جوسپاردان تىس تەكسەرىلەتىن بولدى، دەپ حابارلايدى قازاقپارات.

بۇل تۋرالى ق ر ءىىم توتەنشە جاعدايلار كوميتەتىندە ءورت قاۋىپسىزدىگى سالاسىنداعى مەملەكەتتىك باقىلاۋدى جۇزەگە اسىرۋ ماسەلەلەرى جونىندە وتكەن بريفينگ بارىسىندا بەلگىلى بولدى.

قازاقستانداعى بۇقارالىق نىسانداردىڭ ءبارى 2 ساۋىردەن باستاپ تەكسەرىلەتىن بولدى. تەكسەرۋگە 3 اي بەرىلىپ وتىر. جيىندا اتالعان ۆەدومستۆونىڭ مەملەكەتتىك ءورت باقىلاۋ ءبولىمىنىڭ باستىعى رۇستەم ىسقاقوۆ حابارلاعانداي، كەلەسى ساناتتاعى نىساندار ءورت قاۋىپسىزدىگى بويىنشا تەكسەرىلەتىن بولادى.

ولار: ورتكە ءقاۋىپتى ءوندىرىسى بار كاسىپورىندار، تىنىس-تىرشىلىكتى قامتاماسىز ەتۋ نىساندارى، مۇناي بازالارى مەن مۇناي ونىمدەرىنىڭ قويمالارى، ەليەۆاتورلار، ءبىلىم بەرۋ نىساندارى، ءبىر ۋاقىتتا 200-دەن كوپ ادام باراتىن مادەني-اعارتۋ، ءدىني نىساندار، سپورتتىق كەشەندەر، اۋەجايلار، تەمىرجول، اۆتوكولىك ۆوكزالدارى، اۆتوجانارماي قۇيۋ بەكەتتەرى جانە گاز قويمالارى ستانسيالارى جانە سول سەكىلدى وزگە دە نىساندار.