تارازدا  وقۋشى قىزعا ازعىندىق جاساماق بولعان ازامات قولعا ءتۇستى دەپ حابارلايدى Qamshy.kz اقپارات اگەنتتىگى الماتى ارناسىنا سىلتەمە جاساپ.

ايۋاندىق ارەكەتكە بارعىسى كەلگەن 21 جاستاعى جىگىتتى جەرگىلىكتى تاكسيست پەن وقۋشى قىزدىڭ ۇستازى بىرىگىپ ۇستاپ بەرگەن. قاشىپ قۇتىلماسىن بىلگەن جاس جىگىت ارام ويىنىڭ بولعانىن مويىنداعان.

الەۋمەتتىك جەلىدە №8 مەكتەپتە وقيتىن 3ء-شى سىنىپ وقۋشىسىن زورلاماق بولدى دەگەن كۇدىكتىنىڭ سۋرەتى جاريالانعان. ەرتەسىنە ونىڭ كوشەدە جۇرگەنىن سول وقۋشىنىڭ ءمۇعالىمى كورىپ قالادى. جىگىتتى جالعىز ءوزى قولعا تۇسىرۋگە ءالى كەلمەيتىنىن بىلگەن سوڭ، ۇستاز كوشەدەگى تاكسيستەن كومەك سۇرايدى. بەكبولات دوسانوۆ سوزگە كەلمەي بىردەن كولىگىنە وتىرىپ، كۇدىكتىنىڭ ىزىنە تۇسەدى. قاشامىن دەپ ابدەن شارشاعان جىگىت اقىرى ۇستالعان.

ال كۇدىكتىنىڭ ءوزى قولعا تۇسكەن كەزدە وقۋشى قىزعا ازعىندىق كورسەتىپ، ارام ويىن جۇزەگە اسىرعانىن ايتادى. ءبىراق مەكتەپ ديرەكتورى بولسا، شاكىرتىم ءجابىر كورگەن جوق، وعان مەديسينالىق تەكسەرۋلەر دالەل، دەيدى. ءبىلىم ورداسى باسشىلىعىنىڭ ايتۋىنشا، 3ء-شى سىنىپ وقۋشىسىن جاقىندارى مەكتەپكە جەتكىزبەي جارتى جولدا قالدىرىپ كەتكەن.  ءدال سول كەزدە 21 جاستاعى كۇدىكتى جەتكىنشەكتى تۇنشىقتىرىپ، پودەزگە سۇيرەگەن. كۋاگەرلەر كورىپ ايعاي سالعان سوڭ، ارام پيعىلى ىسكە اسپاي قاشىپ كەتكەن. ءقازىر كۇدىكتى ۇستالعان كەزدەگى  بەينەجازبا الەۋمەتتىك جەلىگە تاراپ، قىزۋ تالقىعا ءتۇسىپ جاتىر. كوبىسى ۇستالعان ازاماتتىڭ اقىل-ەسىندە اۋىتقۋشىلىق بولۋى مۇمكىن دەگەن پىكىردى العا تارتۋدا.

«ەكى قىز كورىپ قالماعان كەزدە ءبارى باسقاشا بولۋى مۇمكىن ەدى. ءبىراق باقىتىمىزعا، قۋانىشىمىزعا وراي، وندايدىڭ الدىن الدىق دەپ ايتۋعا بولادى»، - دەدى  تاراز قالالىق №8 گيمنازيا ديرەكتورىنىڭ مىندەتىن اتقارۋشى الىشەر ءازىمباي.

راسىمەن دە قاماۋعا الىنعان جىگىت پسيحولوگيالىق ديسپانسەردە 10 جىلدان بەرى تىركەۋدە تۇرعانى انىقتالىپتى. ءقازىر ول قاماۋعا الىنىپ، تەرگەۋ امالدارى جۇرگىزىلۋدە. ال ءزابىر كورگەن قىزبەن پسيحولوگتار جۇمىس ىستەپ جاتىر. وسى وقيعادان كەيىن تارازداعى مەكتەپتەردە ءتارتىپ كۇشەيتىلگەن.