الماتى قالاسى بويىنشا مەملەكەتتىك كىرىستەر دەپارتامەنتى دارحان شاعىن اۋدانىنداعى ۇيلەردىڭ بىرىندە ءتىنتۋ جۇمىستارىن جۇرگىزۋ بارىسىندا بەلگىلى ماركالى سويا تۇزدىعىن جاسايتىن استىرتىن جۇمىس ىستەپ جاتقان سەحتى تاپتى، دەپ حابارلايدى Qamshy.kz اقپارات اگەنتتىگى الماتى قالاسى بويىنشا كىرىستەر دەپارتامەنتىنىڭ باسپا ءسوز قىزمەتىنە سىلتەمە جاساپ.  

«سەح يەلەرىنەن 33 744 دايىن سويا تۇزدىعى،   930 000 قاقپاققا جابىستىرىلعان تاۋار بەلگىسى بەينەلەنگەن قاعاز، 524 172 بوتەلكەدەگى قاعاز، 14 400 بوس پلاستماسسا بوتەلكە، 672 672 بوتەلكە قاقپاعى، «Amoy» تاۋار بەلگىسى جابىستىرىلعان 1800 قوراپ، سويا تۇزدىعىن وندىرۋگە ارنالعان قۇرىلعىلار تاركىلەندى» دەلىنگەن ۆەدومستۆا حابارلاماسىندا.

جەرتولەنى جالعا الۋشى سويا تۇزدىعىن وندىرۋگە قاجەتتىنىڭ بارلىعىن ينتەرنەت ارقىلى ساتىپ العان.

الماتى قالاسى بويىنشا مەملەكەتتىك كىرىستەر دەپارتامەنتى زاڭسىز سەحتىڭ جۇمىسى تۋرالى قالاداعى بازارلاردىڭ بىرىندە جۇرگىزىلگەن تەكسەرۋ جۇمىستارىنىڭ ناتيجەسىندە ءبىلدى. سول ۋاقىتتا ساتۋشىلاردان 6 864 قۇتى سويا تۇزدىعى تاركىلەنگەن.