ون شاقتى ورالمان الماتى قالالىق ىشكى ساياسات باسقارماسىنا 8 ءساۋىر كۇنى ساعات 10 مەن 17 ارالىعىندا "سارىارقا" كينوتەاترىنىڭ ارتىنداعى ساياباقتا بەيبىت جيىن وتكىزۋدى سۇراپ حات تاپسىردى. ءوتىنىش بەرۋشىلەر حاتتا بەيبىت جيىنعا مىڭ شاقتى ادام قاتىسادى دەپ كورسەتكەن.

ءوزىن قىتايدان كەلىپ، قازاقستان ازاماتتىعىن الدىم دەپ تانىستىرعان داۋلەتبەك ەربولدىڭ ايتۋىنشا، قىتايعا كەتكەن 75 جاستاعى اناسىنىڭ تۇلقۇجاتىن جۇڭگو بيلىگى تارتىپ الىپ، قايتارىپ بەرمەي، سەرگەلدەڭگە تۇسىرگەن.

- ول جاقتاعى ادامدار دا، ولاردىڭ بۇل جاقتاعى تۋىستارى دا زارداپ شەگىپ جاتىر. ول جاقتاعى قازاقتاردىڭ قۇجاتىن تارتىپ الىپ، قاماپ، ساياسي ۇيرەنۋ ساباقتارىنا جىبەرىپ جاتىر. نە ءۇشىن ۇستاپ وتىر، ءبىر سەبەپ بولۋى كەرەك قوي. ءبىز شەرۋگە شىعامىز، جۇڭگو ديپلوماتتارى كەلىپ جاۋاپ بەرسىن، - دەدى ەربول داۋلەتبەك.

نارازى توپ بۇعان دەيىن اكىمدىككە بەيبىت شەرۋ وكىزۋگە رۇقسات سۇراپ ەكى حات جازعانىن، ءبىراق ەكى وتىنىشتەرى دە ورىندالماعانىن ايتادى.

- العاشقى وتىنىشتە ميتينگىنى جۇڭگو كونسۋلدىعى الدىندا وتكىزۋگە رۇقسات سۇراعانبىز. ءبىراق اكىمدىك ول جەردە ميتينگ وتكىزۋگە بولمايدى دەپ، شەرۋدى "سارىارقا" كينوتەاترىنىڭ ارتىندا وتكىزۋدى ۇسىندى. سوسىن "سارىارقانىڭ" ارتىندا وتكىزۋدى سۇراپ ەكىنشى رەت حات جازعاندا ءوتىنىش بەرۋشىلەردىڭ جەكە باس مالىمەتتەرى دۇرىس ەمەس دەپ كەرى قايتاردى. وسى ارىزىمىزدا بارلىق اقپاراتىمىزدى تولىقتىرىپ اكەلىپ تۇرمىز، - دەدى ەربول داۋلەتبەك.

جينالعاندار بەيبىت شەرۋدە جۇڭگو ۇكىمەتىنەن سول ەلدە زاڭسىز ۇستاپ وتىرعان تۋىستارىن بوساتۋدى، ولاردى قۋدالاۋدى توقتاتۋىن جانە جۇڭگو بيلىگىنىڭ قازاقستانعا كوشكىسى كەلەتىن قازاقتارعا رۇقسات بەرۋىن تالاپ ەتەتىنىن ايتادى.

حاتتى اكىمدىك قىزمەتكەرى اقەركە ءابدىقادىروۆا قابىلداپ الدى. ونىڭ ايتۋىنشا، حاتقا 15 كۇن ىشىندە جاۋاپ بەرىلمەك.

قىتايداعى ەتنيكالىق قازاقتاردىڭ جاپپاي قىسىمعا ۇشىراعانى تۋرالى اقپاراتتار 2017 جىلعى ءساۋىر ايىنان تاراي باستاعان. شىڭجاڭدا ۇستالعاندار اراسىندا قىتايدان تاريحي وتانىنا ورالىپ، قازاقستان ازاماتتىعىنا يە بولعاندار دا بار.