ءماجىلىس دەپۋتاتتارى باقتىقوجا ىزمۇحامبەتوۆ پەن جەكسەنباي دۇيسەبايەۆ، سەنات دەپۋتاتى عۇمار دۇيسەمبايەۆ جۇمىس ساپارىمەن اتىراۋ وبلىسىنا كەلدى، - دەپ حابارلايدى Qamshy.kz اقپارات اگەنتتىگى اتىراۋ وبلىستىق وڭىرلىك كوممۋنيكاسيالار قىزمەتىنىڭ مالىمەتىنە سۇيەنىپ.
جۇمىس ساپارى بارىسىندا دەپۋتاتتار ماحامبەت اۋدانىنداعى الەۋمەتتىك جانە وندىرىستىك نىساندارمەن تانىستى.
«المالى قۇس» قۇس فابريكاسى ايماقتاعى ءىرى وندىرىستىك نىسانداردىڭ قاتارىنان سانالادى. مەكەمەدە 100-دەن استام قىزمەتكەر بار، ءۇش سەحتا تاۋلىگىنە 150 مىڭ جۇمىرتقا وندىرىلەدى. 2017 جىلدان 2018 جىلدىڭ ناۋرىزىنا دەيىن قۇس فابريكاسىندا 50 مىڭ توننا قۇس ەتى ءوندىرىلدى.
مەكەمە باسشىسىنىڭ ايتۋىنشا، ءوندىرىس قۋاتىن ۇلعايتۋ ءۇشىن قوسىمشا جابدىقتار الىپ، تاعى ءبىر سەحتى ىسكە قوسۋ كەرەك.
دەپۋتاتتار «بودەنە» قۇس فابريكاسىنىڭ دا جۇمىسىمەن تانىستى. فابريكادا 6230 بودەنە بار، كۇنىنە 1700 بودەنە جۇمىرتقاسى شىعارىلادى، ولار وبلىس مەكتەپتەرىنە جەتكىزىلەدى.
دەپۋتاتتار «ءبىرىنشى مامىر» ءسۇت فابريكاسىندا دا بولدى، مۇندا 1100 اسىل تۇقىمدى گوللاند سيىرلارى بار. كۇنىنە 27 ءتۇرلى ءسۇت ونىمدەرىن وندىرەدى. ءبىر اسىل تۇقىمدى سيىر جىلىنا 6400 ليتر ءسۇت بەرەدى.
ماحامبەت اۋدانىنا جۇمىس ساپارى كەزىندە دەپۋتاتتار جايىق وزەنى ۇستىنەن سالىنىپ جاتقان كوپىر قۇرىلىسىن بارىپ كوردى. جاڭا نىسان ماحامبەت، يندەر اۋداندارى اراسىنداعى كولىك قاتىناسىن رەتتەپ، وبلىس ورتالىعىن كەپتەلىستەن بوساتادى.
حالىق قالاۋلىلارى، سونداي-اق، ماحامبەت اۋدانى تۇرعىندارىمەن كەزدەسىپ، مەملەكەت باسشىسىنىڭ بەس الەۋمەتتىك باستاماسىن جۇزەگە اسىرۋدىڭ باستى قاعيدالارىن تالقىلادى. جۇرتشىلىقپەن جۇزدەسۋگە وبلىس اكىمى نۇرلان نوعايەۆ تا قاتىسىپ، ەلباسى باستاماسىنىڭ ماڭىزدىلىعى جايىندا ايتتى جانە جەرگىلىكتى اتقارۋشى ورگاندار تاراپىنان ونى جۇزەگە اسىرۋ باعىتىندا جاسالىپ جاتقان جۇمىستاردى باياندادى.
