كەمەروۆو وبلىسىنىڭ گۋبەرناتورى امان تولەيەۆ رف پرەزيدەنتى ۆلاديمير پۋتينگە ءوز ەركىمەن قىزمەتىنەن كەتۋ تۋرالى ءوتىنىش تاپسىردى، دەپ حابارلايدى تاسس.
ا. تولەيەۆ كەمەروۆوداعى قايعىلى وقيعادان سوڭ ەڭ دۇرىس شەشىم وسى ەكەنىن مالىمدەگەن.
— كەمەروۆودا 25 ناۋرىزدا بولعان جانتۇرشىگەرلىك قايعىلى وقيعاعا قابىرعامىز قايىسىپ وتىر. ءبىز 64 ادامنان ايىرىلدىق، ولاردىڭ كوپشىلىگى - بالالار. ءارقايسىمىز وسىناۋ اۋىر قايعىنى جۇرەگىمىزدەن وتكىزدىك، - دەيدى امان تولەيەۆ.
— بۇل ءوزىم ءۇشىن دۇرىس، ەڭ ءادىل شەشىم دەپ ەسەپتەيمىن، ويتكەنى مۇنداي اۋىر جۇكپەن گۋبەرناتور بولىپ وتىرۋ كەرەك ەمەس، مورالدىق تۇرعىدان مۇمكىن ەمەس، - دەدى ول.
سونىمەن قاتار ول قولىنان كەلگەننىڭ ءبارىن ىستەگەنىن ايتتى. «مەن قولىمنان كەلگەننىڭ ءبارىن ىستەدىم، كومەك كورسەتۋ ماسەلەلەرىن شەشۋگە تىرىستىم. زور قايعىعا تاعى ءبىر رەت ورتاقتاستىق بىلدىرەمىن. ءبىراق ءومىر ءسۇرۋ كەرەك قوي، مارقۇمدار جادىن ساقتاۋ ءۇشىن ءومىر ءسۇرۋ كەرەك»، - دەدى گۋبەرناتور.
«قۇداي الدىنداعى ادالدىعىمدى ايتايىن، مەن ءوز قىزمەتىمدە ءارقاشان ەلدىڭ، رەسەيدىڭ مۇددەسىن، وبلىستىڭ مۇددەسىن ويلادىم. بارشاڭىزعا ۇنەمى، قۋانىشىمدا دا، قايعىمدا دا بىرگە بولعاندىقتارىڭىز ءۇشىن تاعى ءبىر رەت راحمەت. تاعزىمىمدى قابىل العايسىزدار»، - دەدى امان تولەيەۆ.
73 جاستاعى امان تولەيەۆ كەمەروۆو وبلىسىن 1997 جىلدان بەرى باسقارىپ كەلەدى.
