Forbes Kazakhstan جۋرنالى مەن Ratel.kz سايتىنىڭ الماتىداعى رەداكسيادارىن 2 ساۋىردە تىنتىگەن سوڭ ۇستالعان جۋرناليستەر بوساتىلدى.

Ratel.kz سايتىنىڭ باس رەداكتورى مارات ءاسىپوۆ، باس رەداكتوردىڭ ورىنباسارى ساپا مەكەبايەۆ جانە جۋرناليست اننا كالاشنيكوۆا دۇيسەنبى كۇنى كەشكە ىشكى ىستەر دەپارتامەنتىندەگى تەرگەۋدەن شىقتى. بۇل تۋرالى Ratel.kz ءجۋرناليسى ۆاديم بورەيكو Facebook-تەگى پاراقشاسىندا حابارلادى. ونىڭ الدىندا Forbes Kazakhstan جۋرنالى باس رەداكتورىنىڭ ورىنباسارى الەكساندر ۆوروتيلوۆ بوساتىلعان.

جۋرناليستەردى رەداكسياداعى تىنتۋدەن سوڭ ۇستاعان ەدى. الماتى پوليسياسى بۇل ارەكەتىن ەكى اقپارات قۇرالى «ادەيى جالعان مالىمەت تاراتادى» دەلىنگەن «ازامات ك» ارىزىمەن بايلانىستىردى. «ازامات ك» - بۇرىنعى مەملەكەتتىك كىرىستەر ءمينيسترى، كاسىپكەر زەينوللا كاكىمجانوۆ، دەيدى ب ا ق قىزمەتكەرلەرى. كاكىمجانوۆ وتكەن جىلى اتالعان باسىلىمدارمەن سوتتاسىپ، ولاردان 50 ملن تەڭگە ءوندىرۋ شاعىمىن جەڭىپ شىققان. كاكىمجانوۆتىڭ جەمقورلىق سحەماسىن اشكەرەلەمەك بولعان جۋرناليستەر سوتتىڭ بۇل شەشىمىمەن كەلىسپەدى.

پوليسيا Forbes Kazakhstan رەداكسياسىن تىنتىگەن سوڭ، ۆوروتيلوۆتىڭ جۇمىس كومپيۋتەرىن الىپ كەتتى. وتكەن اپتادا بۇعاتتالعان Ratel.kz سايتىنىڭ رەداكسياسىنان دا كومپيۋتەرلەر مەن قۇجاتتار الىنعان.

كاكىمجانوۆ Facebook الەۋمەتتىك جەلىسىندەگى پاراقشاسىندا وزىنە قارسى ماقالالاردى «تاپسىرىسپەن جازىلعان» دەپ اتادى.