دۆك ماتەريالدارىن شەكتەۋگە قاتىستى سوت تالابىن تالابىن ورىنداماعان جاعدايدا Telegram مەسەنجەرى قازاقستاندا بۇعاتتالۋى مۇمكىن. بۇل تۋرالى اقپارات جانە كوممۋنيكاسيالار ءمينيسترى داۋرەن ابايەۆ ايتتى، دەپ حابارلايدى ريا نوۆوستي.

ءمينيستردىڭ سوزىنشە، Telegram مەسەنجەرىنە دۆك ماتەريالدارىن ءوشىرۋ نەمەسە دۆك ماتەريالدارىنا قازاقستان اۋماعىنان كىرۋگە شەكتەۋ قويۋ جونىندەگى سوت شەشىمى جىبەرىلگەن.

«ءقازىر ءبىزدىڭ ەسكەرتۋ حاتىمىز Telegram مەسەنجەرى اكىمشىلىگىنىڭ قاراۋىندا جاتىر. سوت تالابى ورىندالماسا، مينيسترلىك ق ر زاڭناماسى شەڭبەرىندە مەسەنجەردىڭ رەسپۋبليكا اۋماعىندا تارالۋىن شەكتەپ، ءتىپتى، تولىق بۇعاتتاۋى مۇمكىن»، - دەدى داۋرەن ابايەۆ.

ناۋرىزدىڭ ورتا شەنىندە استانا قالاسىنىڭ ەسىل اۋداندىق سوتى تىركەلمەگەن دۆك قوزعالىسىن ەكسترەميستىك ۇيىم دەپ تانىپ، ونىڭ قازاقستان رەسپۋبليكاسى شەگىندە جۇمىس ىستەۋىنە تىيىم سالعان ەدى. ۇيىمدى قاشقىن بانكير مۇحتار ءابىلازوۆ باسقارادى.

قازاقستاننىڭ باس پروكۋراتۋراسى «ءابىلازوۆتىڭ ماقساتى – بيلىكتى باسىپ الۋ» دەپ مالىمدەدى.

2017 جىلدىڭ ماۋسىم ايىندا الماتى سوتى مۇحتار ءابىلازوۆتى قىلمىستىق توپ قۇرعانى جانە بانك قارجىسىن جىمقىرعانى ءۇشىن كىنالى دەپ تاۋىپ، 20 جىلعا باس بوستاندىعىنان ايىرۋعا ۇكىم شىعارعان بولاتىن. سوت شەتەلدە جاسىرىنىپ جۇرگەن ءابىلازوۆتىڭ قاتىسۋىنسىز ءوتتى. سىبايلاس جەمقورلىققا قارسى كۇرەس بويىنشا ۇلتتىق بيۋرونىڭ دەرەگىنشە، ەكس-بانكير مەملەكەتكە 7،5 ميلليارد دوللاردان استام زيان كەلتىرگەن.