الماتى قالاسىنداعى راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ بازاسىندا تمد مەملەكەتتەرىنىڭ جوعارى اسكەري ءبىلىم بەرۋ ۇيىمدارى كۋرسانتتارىنىڭ ماتەماتيكا پانىنەن IV حالىقارالىق وليمپياداسى ءوز مارەسىنە جەتتى، دەپ حابارلايدى Qamshy.kz اقپارات اگەنتتىگى رەجبايي باسپا ءسوز قىزمەتىنە سىلتەمە جاساپ.
حالىقارالىق وليمپياداعا قازاقستان، ارمەنيا، بەلارۋس، قىرعىزستان، وزبەكستان، تاجىكستان جانە رەسەي فەدەراسياسىنىڭ كوماندالارى قاتىستى.
تمد قاتىسۋشى مەملەكەتتەردىڭ قورعانىس مينيسترلەرى كەڭەسىنىڭ ءتوراعاسى – رەسەي فەدەراسياسىنىڭ قورعانىس ءمينيسترى ارميا گەنەرالى س.شويگۋ مەن قازاقستان رەسپۋبليكاسىنىڭ قورعانىس ءمينيسترى گەنەرال-پولكوۆنيك س.جاسۇزاكوۆ اتالعان ءبىلىم سايىسىنا تىكەلەي جەتەكشىلىك ەتكەن. وليمپيادانىڭ باستى ماقساتى – اسكەري وقۋ ورىندارىندا وفيسەرلىك قۇرامنىڭ ساپالى دايىندىعىنا ءجىتى كوڭىل ءبولۋ، اسكەري مامانداردى ساپالى دايىنداۋ، كاسىبي دەڭگەيدە ىنتالاندىرۋ، عىلىمي جانە شىعارماشىلىق قابىلەتتەرىن ارتتىرۋ، وقىتۋشى-پروفەسسورلار قۇرامىنىڭ كاسىبي دەڭگەيىن كوتەرۋ، ءدارىس بەرۋدىڭ ادىستەمەسىن جەتىلدىرۋ جانە دە جوعارى اسكەري وقۋ ورىندارى اراسىندا ساپالى باسكەلەستىك قۇرۋ.
سونىمەن قاتار، وليمپيادا اياسىندا حالىقارالىق عىلىمي –تاجىربيەلىك كونفەرەنسيا وتكىزىلدى. كونفەرەنسيا جۇمىسىنا تمد قاتىسۋشى ەلدەرىنىڭ ايگىلى عالىمدارى مەن وقىتۋشىلارى، اسكەري جوو-نىڭ كۋرسانتتار كوماندالارىنىڭ جەتەكشىلەرى قاتىستى. كونفەرەنسيا بارىسىندا اسكەري ءبىلىم جانە عىلىمنىڭ جاي-كۇيى، تمد مەملەكەتتەردىڭ اسكەري جوو-دا جاراتىلىستانۋ، عىلىمي جانە ينجەنەرلىك پاندەردى وقىتۋ ماسەلەلەرى كەڭىنەن تالقىلاندى. سونداي-اق، پروفەسسورلىق-وقىتۋشىلار قۇرامى مەن كۋرسانتتاردىڭ عىلىمي قىزمەت سالاسىندا ورىن العان وزەكتى ماسەلەلەر قاراستىرىلدى.
– راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ كۋرسانتتارى ەكىنشى جىل قاتارىنان 2 ورىندى يەلەنىپ وتىر. بۇعان قوسا، تمد مەملەكەتتەرىنىڭ جوعارى اسكەري ءبىلىم بەرۋ وقۋ ورىندارى اراسىندا اعىلشىن تىلىنەن ءىV حالىقارالىق وليمپياداسىندا ءبىزدىڭ كۋرسانتتار 3 ورىنعا قول جەتكىزگەن بولاتىن. بۇل ينستيتۋت قابىرعاسىندا ەڭبەك ەتىپ جۇرگەن وقىتۋشى-پروفەسسورلار قۇرامىنىڭ كاسىبي شەبەرلىكتەرىنىڭ ايقىن دالەلى، - دەپ اتاپ ءوتتى اسكەري وقۋ ورنىنىڭ باسشىسى پولكوۆنيك اسقار مۇستابەكوۆ.
تمد مەملەكەتتەرىنەن جينالعان كۋرسانتتار 3 كەزەڭنەن تۇراتىن ماتەماتيكالىق سايىستا باقتارىن سىنادى. ابساليۋتتىك كوماندالىق بىرىنشىلىكتە 1 ورىندى رەسەي فەدەراسياسى يەلەندى، 2 ورىندا قازاقستاندىق كوماندا، ال 3 ورىن وزبەكستان كومانداسىنا بۇيىردى.
پىكىر قالدىرۋ