بۇگىن، 11 ءساۋىر ازەربايجان رەسپۋبليكاسىندا كەزەكتەن تىس پرەزيدەنتتىك سايلاۋ وتەدى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىگە الا وتىرىپ. ايتا كەتەرلىگى، كەزەكتى پرەزيدەنتتىك سايلاۋ 2018 جىلدىڭ كۇزىندە ءوتۋى ءتيىس بولاتىن. الايدا، ازەربايجان پرەزيدەنتى يلحام الييەۆتىڭ پرەزيدەنتتىك سايلاۋدى 2018 جىلدىڭ 11 ساۋىرىنە تاعايىنداۋ تۋرالى وكىمى 5 اقپان كۇنى جاريالاندى.

سايلاۋدى مەرزىمىنەن بۇرىن، كەزەكتەن تىس تارتىبىندە وتكىزۋ نەگىزىنەن ازەربايجاندا ساياسي جانە الەۋمەتتىك-ەكونوميكالىق رەفورمالاردى جۇزەگە اسىرۋعا قوسىمشا مۇمكىندىكتەر بەرەتىنىمەن تۇسىندىرىلگەن. سونداي-اق، بيىلعى جىلدىڭ ەكىنشى جارتىسىندا ازەربايجاندا جوعارى دەڭگەيدەگى ءبىرقاتار حالىقارالىق ءىس-شارالاردى ۇيىمداستىرۋ جوسپارلانىپ وتىرعانى ايتىلادى. سونىڭ ەڭ باستىسى - ازەربايجان دەموكراتيالىق رەسپۋبليكاسى قۇرىلعانىنىڭ 100 جىلدىعى. اتالعان دەڭگەيى جوعارى مەرەكە دە كۇزگە  بەلگىلەنگەن.

وسىنداي اۋقىمدى شارالاردى نەگىزگە العان مەملەكەت باسشىسى كەزەكتەن تىس سايلاۋ وتكىزۋدى جاريالاعان بولاتىن. سايلاۋشىلار پرەزيدەنتكە ۇمىتكەر 8 كانديدات بويىنشا سايلاۋ قۇقىقتارىن جۇزەگە اسىراتىن بولادى. كانديداتتار قاتارىندا بيلىك پارتياسى - «ەني ازەربايدجان» پارتياسى ۇسىنعان ەلدىڭ قازىرگى پرەزيدەنتى يلحام الييەۆ، ءوزىن-وزى ۇسىنۋشى زاحيدا ورۋدجا، سوسيال-دەموكراتيالىق پارتياسىنىڭ وكىلى اراز اليزادە، ءبىرتۇتاس حالىق مايدانى پارتياسىنان گۋدرات گاسانگۋلييەۆ، «ۇلتتىق ورلەۋ قوزعالىسى» پارتياسىنان ۇسىنىلعان فاراد گۋلييەۆ، «جاڭا مۋساۆات» پارتياسىنان حافيز گۋدجييەۆ، ۇلتتىق مايدان توپتارىنىڭ وكىلى رازي نۋرۋللايەۆ، ازەربايجان دەموكراتيالىق پارتياسىنان ساردار مامەدوۆ بار.

بۇل جولعى سايلاۋدىڭ ەڭ باستى ەرەكشەلىگى - پرەزيدەنت بۇرىنعىداي بەس جىل مەرزىمگە ەمەس، جەتى جىل مەرزىمگە سايلانادى. ويتكەنى 2016 جىلدىڭ كۇزىندەگى كونستيتۋسياعا وزگەرىستەر مەن تولىقتىرۋلار ەنگىزۋ تۋرالى جالپىحالىقتىق رەفەرەندۋمدا پرەزيدەنتتىڭ وكىلەتتىك مەرزىمى جەتى جىلعا ۇزارتىلدى.