اقتوبەدە جاڭا اۋداندارعا بەرىلەتىن استانا مەن الماتى اتاۋىنا جەرگىلىكتى حالىق قارسى شىقتى. تۇرعىنداردىڭ سوزىنشە، قالا اكىمدىگى جانىنان قۇرىلعان كوميسسيا قوعامنىڭ پىكىرىمەن ساناسپاي، وزدەرى بيلەپ-توستەپ جاتقان كورىنەدى. وسى وڭىرگە قاتىستى جەرگىلىكتى جەر-سۋ اتتارىن ەلەمەي، جاڭا اۋداندى استانا مەن الماتى دەپ اتايمىز دەپ الاشاپقىن بولعان شەندىلەردىڭ ارەكەتى ۇلكەن داۋعا ۇلاستى. اشىنعان اقتوبەلىكتەر ەندى قول جيناپ، پرەزيدەنتتىڭ اتىنا اشىقحات دايىنداپ جاتىر. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىن نەگىزگە الىپ حابارلايدى.   

اقتوبەنىڭ ەكى اۋدانعا بولىنگەنى ەمەس ونىڭ اتاۋى قوعامدا قىزۋ پىكىرتالاس تۋدىردى. ءالىپتىڭ ارتىن باقتى ما، الدە رەتى سولاي بولدى ما،  ءاتقارۋشى بيلىك كوپتىڭ پىكىرىن بىلەمىز دەپ جۇمىس كۇندەرى قوعامدىق تىڭداۋ ۇيىمداستىردى. ستۋدەنتتەر مەن زەينەتكەرلەر تالقىلاۋعا بەلسەندى قاتىستى دەپ ايتۋ قيىن. زالداعىلاردىڭ تەك بىرەن-سارانى ەكى اۋدانعا باۋىرجان مومىش ۇلى مەن راقىمجان قوشقاربايەۆ، ءابىلقايىر حان نەمەسە بوگەنباي اتاۋلارىن بەرۋدى ۇسىندى. ال مىنبەرگە كوتەرىلگەندەر الماتى مەن استانا تاۋىپ قويىلعان اتاۋ دەپ، قولداپ جاتتى. الايدا، قوعامدىق تىڭداۋعا  قاتىسا الماي قالعان قاراپايىم تۇرعىنداردىڭ پىكىرى باسقا.

اكىمدىكتەگىلەر ءتۇرلى پىكىرلەردىڭ بولۋى زاڭدى قۇبىلىس ەكەنىن ايتادى.  ءبىراق،  كوميسسيا تالقىلاي كەلە، الماتى مەن استاناعا  توقتاۋدى ءجون كوردى دەپ قىسقا قايىردى.

«حالىقتان دا كەلىپ ءتۇستى ۇسىنىس الماتى مەن استانا دەگەن اتاۋ تۋرالى. جۇمىس توبىنىڭ شەشىمى بويىنشا، وسى ەكى اتاۋدى ۇسىندىق» - دەيدى قالا اكىمىنىڭ ورىنباسارى كۇلپارشىن ايدارحانوۆا.

جەرگىلىكتى تۇرعىندار اۋداننىڭ اتاۋى قالاي بولادى دەگەننەن قالالىق اكىمدىككە ۇسىنىستارىن ايتقاندار بولعان. سولاردىڭ ءبىرى – ەستاي جايلىباي. ونىڭ تاڭداۋى الاش پەن ازات اتاۋلارىنا ءتۇسىپتى. ءبىراق، كوميسسيانىڭ كوڭىلىنەن شىقپاعان بولۋى كەرەك، ۇسىنىس ەسكەرۋسىز قالىپتى. 

«اتاۋلاردى قايتالاۋعا قارسى اداممىن. مىسالى ۇلكەن  قالا الماتى، ۇلكەن قالا استانا. ەندى ونى الىپ كەلىپ اقتوبەگە تەلۋدىڭ مەنىڭشە ەش قاجەتتىلىگى جوق. ءار اتتىڭ ەكى تىلدە  بىردەي اتالۋىنا جانە ونىڭ تاريحي تاربيەلىك ءمانى بولۋىنا  كوڭىل بولىنسە ەكەن دەيمىن. مەنىڭ ءوزىمنىڭ وسى جەردە ۇسىنىپ وتىرعان اتىم بۇل – الاش پەن ازات دەگەن اتاۋ»، — دەيدى قالا تۇرعىنى ەستاي جايلىباي.

شەندىلەر جاڭا ەكى اۋدانعا الماتى مەن استانا اتاۋلارىن بەرۋ كەرەك دەپ ساناسا، كوپشىلىكتىڭ تاڭداۋى ەلەك پەن سازدىعا ءتۇسىپ وتىر. بۇل ەكەۋى: بىرەۋى قالانىڭ ىشىمەن، بىرەۋى سىرتىندا اعىپ جاتقان وزەندەردىڭ اتاۋى. الايدا سوڭعى شەشىمدى رەسپۋبليكالىق ونوماستيكا كوميسسياسى قابىلدايدى. وعان دەيىن وبلىستىق ءماسليحات دەپۋتاتتارى تالقىعا سالۋلارى ءتيىس.

بۇل ماسەلە قالالىق ءماسليحاتتىڭ وتىرىسىندا تالقىلانىپ، شەشىم قابىلدانىپ كەتتى. الايدا، تۇرعىندار  مۇنىمەن كەلىسپەيدى. ءقازىر حالىق پرەزيدەنتكە اشىق حات ازىرلەپ جاتىر. وندا اۋداندارعا اتاۋ بەرۋ كەزىندە حالىقتىڭ پىكىرىن ەسكەرۋدى سۇراعان.