قاراعاندىدا وسىدان ءبىر اي بۇرىن پاتەرلەرى ورتەنىپ كەتكەن سەگىز وتباسى ءالى كۇنگە دەيىن دالادا ءجۇر دەپ جازادى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىنە سۇيەنىپ. وتىزدان اسا ادام اكىمدىكتىڭ تابىلدىرىعىن ابدەن توزدىرعاندارىن ايتادى. بۇگىن دە شاھار باسشىسى وتىراتىن عيماراتقا باسا كوكتەپ كىرىپ، قول ۇشىن بەرۋىن تاعى ءبىر مارتە سۇرادى.
ءبىر ايدان بەرى تۋعان-تۋىستارىن جاعالاپ، ۇيسىز-كۇيسىز جۇرگەندەردىڭ بۇگىندە بارار جەرلەرى تاۋسىلعان. شىدامدارى دا ابدەن شەگىنە جەتىپتى. ويتكەنى، 8 وتباسىدان قۇرالعان باس-اياعى 32 ادامنىڭ ىشىندە مۇگەدەك تە، ءتىپتى نەبارى توعىز ايلىق نارەستە دە بار. ايتۋلارىنشا، كومەك سۇراپ، تالاي تابالدىرىقتى توزدىرسا دا، جاۋاپتى مەكەمەلەر قيمىلدايتىن ەمەس.
«وسى كۇنگە دەيىن سالىقتى دا، كوممۋنالدى قىزمەتتەردىڭ تولەمىن دە ەش كەشىكتىرمەستەن ۋاقىتىلى تولەپ كەلدىك. ءبىراق، ءبىزدىڭ باسىمىزعا ءىس تۇسكەن كەزدە، قۇزىرلى ورگاندار بىزدەن قاشىپ وتىر. وسى دۇرىس پا؟ مۇندايدا مەملەكەت كومەكتەسپەسە، ەندى كىمگە جۇگىنەمىز؟» - دەيدى زارداپ شەگۋشى يۋليا ۆايمن.
«سەنەسىز بە؟ ءبىر ايدان بەرى دالادا ءجۇرمىز. ارامىزدا جاسىنا دا تولماعان ءسابيىمىز بار. كۇلگە اينالعان ءۇيىمىز 70 جىل بۇرىن سالىنعان. ەكى قاباتتان عانا تۇرادى. ال كورشى كوشەلەردە ءۇش قاباتتى، ءارى بەرتىن سالىنعان ۇيلەر ءسۇرىلىپ جاتىر. الدىمەن، اكىمدىك ۇيسىزدەردىڭ ماسەلەسىن شەشىپ بەرمەي مە؟» - دەيدى زارداپ شەگۋشى ۆيكتوريا تەن.
توتەنشە جاعداي جەتىنشى ناۋرىزدا ءتۇن ورتاسىندا تىركەلگەن.
ءورت ەكى قاباتتى ءۇيدىڭ شاتىرىنان شىققان بولاتىن. اعاشتان سالىنعان 8 پاتەرلىك ەسكى ءۇي ورتالىق قازاندىققا قوسىلماعاندىقتان، ءار پاتەرگە جەكە پەش ورناتىلعان. ال سول ءتۇنى قاتتى جەلدەن مۇرجادان شىققان شوق شاتىرعا ءتۇسىپ، بارلىق ۇيدەگى دۇنيە-مۇلىك كۇلگە اينالعان. سوندىقتان، «اكىمدىك تىم بولماسا، قۇجاتىمىزدى راسىمدەپ بەرسە» دەيدى اشىنعان تۇرعىندار.
«ساتبايەۆ قالاسىندا تۋرا وسىنداي جاعداي تىركەلگەن ەكەن. ءبىر ادام قازا تاۋىپتى. ولارعا جاڭا ۇيلەردەن باسپانا بەرىپ جاتىر. ءبىزدىڭ سوندا قاي جەرىمىز كەم؟ الدە ادامنىڭ قازاسى كەرەك پە ەدى... بىزگە ءزاۋلىم ءۇي دە، جاڭا ءۇي دە، بىرنەشە بولمەلى پاتەر دە كەرەك ەمەس!!!! تەك قۇجاتىمىزدى رەتكە كەلتىرىپ بەرسە ەكەن» - دەيدى زارداپ شەگۋشى سۆەتلانا ۆاسەلكوۆا.
دەگەنمەن، ماسەلە ءوز شەشىمىن تاباتىن ءتۇرى بار. «اكىمدىكتەن ءتيىستى جاۋاپ المايىنشا، بۇل جەردەن كەتپەيمىز» دەگەن تۇرعىندارعا شەنەۋنىكتەر وڭ كوزبەن قاراي باستاعانداي. دەمەۋشىلەردىڭ كومەگىمەن، باسپاناسىز قالعان جاندارعا جاقىن ۋاقىتتا جاڭادان ءۇي تۇرعىزىلماق.
«قالا اكىمشىلىگىنىڭ قابىلداۋىندا بولدىق. اكىمدىكپەن دە، ءبىزدىڭ قورمەن دە بىرىگىپ جۇمىس جاسايتىن بولدىق. ەڭ الدىمەن دوكۋمەنت جاعىن رەتتەپ العاننان كەيىن، وسى ۇيلەردى جاڭادان تۇرعىزۋعا بەل بۋىپ وتىرمىز. قالاي قۇجاتتارى تۇگەل بولادى، سولاي ءبىز قۇرىلىستى باستايمىز». – دەيدى دەمەۋشى نۇرجان زاكەنوۆ.
«ءبىز تۇرعىنداردىڭ جاعدايىن تۇسىنەمىز. سوندىقتان ارينە، قۇجاتتاردى راسىمدەۋ، تىركەۋ جاعىنان كومەكتەسەمىز. سەبەبى، كەيبىرىنىڭ قۇجاتتارى مۇلدەم جانىپ كەتكەن. ءقازىر ماسەلە اۋداندىق جانە قالا اكىمدىگىنىڭ باقىلاۋىندا» - دەيدى قازىبەك بي اۋدانىنىڭ اكىمى تاتيانا شاتوحينا.
جاڭا باسپانانى سالۋ ءۇشىن الدىمەن تۇرعىنداردىڭ جانىپ كەتكەن قۇجاتتارى راسىمدەلمەك. بۇل ءىس وڭ شەشىمىن تاپقان سوڭ، ورتەنگەن ءۇيدىڭ ورنىنا جاڭاسى بوي كوتەرەدى. اكىمدىك تاراپى دا «قۇجات ماسەلەسىن شەشۋگە مۇرىندىق بولامىز» دەگەن ۋادەسىن توگۋدە.
