شانحاي قور بيرجاسىندا «سامۇرىق-قازىنا» ۇلتتىق ءال-اۋقات قورى» اق-نىڭ ينۆەستور كۇنى ءوتتى. ءىس-شارا قوردىڭ 215 اكتيۆىن باسەكەلەستىك ورتاعا بەرۋدى قاراستىراتىن جەكەشەلەندىرۋ باعدارلاماسىن جۇزەگە اسىرۋ اياسىندا وتكىزىلدى.

قوردىڭ ەنەرگەتيكا، كولىك پەن لوگيستيكا، تاۋ-كەن جانە مۇناي-حيميا سالالارىنداعى قورجىندىق كومپانيالارى وكىلدەرى قىتايلىق كاسىپكەرلەرگە قازاقستانعا ينۆەستيسيا سالۋ مۇمكىندىكتەرى، كومپانيالاردىڭ دامۋ قارقىنىنا بايلانىستى باسەكەلەستىك ارتىقشىلىقتارى، وڭىرلىك جانە جاھاندىق نارىقتىڭ شارتتارى جايلى كەڭىنەن باياندادى.

«قوردىڭ جانە ونىڭ قورجىندىق كومپانيالارىنىڭ دامۋى قازاقستانداعى وڭ وزگەرىستەردىڭ نەگىزىندە جۇزەگە اسىرىلۋدا. ۇكىمەت مەملەكەتتىڭ ەكونوميكاداعى ۇلەسىن ازايتىپ، ونداعى جەكە سەكتوردى بەلسەندى تۇردە كەڭەيتۋدە جانە ەكونوميكانى جاڭعىرتۋدا زور تابىستارعا قول جەتكىزۋدە. مەن ءبىزدىڭ قىتايلىق ارىپتەستەردى «سامۇرىق-قازىنانىڭ» مۇناي مەن گاز، كولىك پەن لوگيستيكا، تاۋ-كەن مەن تەلەكوممۋنيكاسيا سالالارىنداعى جوبالارعا بەلسەندى تۇردە ينۆەستيسيا سالۋعا شاقىرامىن»، - دەپ اتاپ ءوتتى «سامۇرىق-قازىنا» اق باسقارما ءتوراعاسى احمەتجان ەسىموۆ.

قوردىڭ 9 ءىرى كومپانياسىنىڭ جەتەۋىن ءىرو ارقىلى جەكەشەلەندىرۋ جوسپارلانعان. بۇل اكتيۆتەردىڭ ساۋداسى 2020 جىلعا دەيىن كەزەڭ بويىنشا جۇزەگە اسىرىلادى. ءبىرىنشى كەزەڭدە قوردىڭ «قازاقتەلەكوم»، «ەير استانا» جانە «قازاتومونەركاسىپ»، ەكىنشى كەزەڭدە «سامۇرىق-ەنەرگو» جانە «قازمۇنايگاز»، ءۇشىنشى تولقىن اياسىندا «قازپوشتا» جانە «قازاقستان تەمىر جولى» كومپانيالارىنداعى ۇلەسى ساتىلادى. جوسپار بويىنشا ەكى اكتيۆ  ستراتەگيالىق ينۆەستورعا ساتىلادى: «تاۋ-كەن سامۇرىق» جانە Qazaq Air.

«تمد ەلدەرىنىڭ اراسىندا قازاقستان كولەمى بويىنشا قىتايدىڭ ەكىنشى ساۋدا سەرىكتەسى بولىپ تابىلادى جانە ينۆەستيسيالار ءۇشىن باسىمدىققا يە. 2017 جىلى جۇڭگو مەن قازاقستان اراسىنداعى ەكىجاقتى ساۋدا-ساتتىق 18 ملرد اقش دوللارىنا جەتتى. قازاقستان ءۇشىن «ءبىر بەلدەۋ، ءبىر جول»  باستاماسىنا قاتىسۋ جانە «نۇرلى جول» جاڭا ەكونوميكالىق ساياساتىن جۇزەگە اسىرۋ ەكى ەلدىڭ ىنتىماقتاستىعىندا ماڭىزعا يە ينۆەستيسيالارعا جانە ينفراقۇرىلىمدى سالۋعا جاڭا مۇمكىندىكتەر اشادى»، - دەپ اتاپ ءوتتى شانحاي قور بيرجاسىنىڭ پرەزيدەنتى حۋان حۋنيۋان.

«سامۇرىق-قازىنا» باسشىلىعىنىڭ پىكىرىنشە، جەكەشەلەندىرۋ – قوردىڭ دامۋ ستراتەگياسىن جۇزەگە اسىرۋدا باستى رولگە يە. بۇل كومپانيالار توبىنىڭ باسەكەگە قابىلەتتىلىگىن جانە تيىمدىلىگىن ارتتىرۋعا، كورپوراتيۆتىك باسقارۋ ساپاسىن جاقسارتۋعا مۇمكىندىك بەرەدى. ستراتەگيالىق ينۆەستورلارمەن ورناتىلعان ارىپتەستىك ارقىلى كاسىپورىندار ءۇشىن جاڭا تەحنولوگيالار قولجەتىمدى بولماق. بۇگىندە قوردىڭ كەيبىر قورجىندىق كومپانيالارىندا جەكە اكسيونەرلەر بار.  ماسەلەن، قازاقستانداعى تەلەكوممۋنيكاسيالىق نارىقتىڭ كوشباسشىسى «قازاقتەلەكوم» اق نەمەسە «ەير استانا» اق.  «تۇلپار-تالگو» يسپانيالىق Talgo كومپانياسىمەن بىرلەسە جولاۋشىلار ۆاگوندارى ءوندىرىسىن وڭ جولعا قويدى. «لوكوموتيۆ قۇراستىرۋ زاۋىتى» فرانسيالىق Alstom كومپانياسىنىڭ تەحنولوگيالارىن پايدالانىپ، ەلەكتروۆوزداردى شىعارادى. قور ينۆەستيسيا ەسەبىنەن الىنعان قارجىنى جاڭا جوبالار مەن سالالاردى دامىتۋعا باعىتتاۋدى جوسپارلاپ وتىر.

سونىمەن قاتار، «سامۇرىق-قازىنا» ۇلتتىق ءال-اۋقات قورى» اق باسقارما ءتوراعاسى احمەتجان ەسىموۆ گونكونگ قور بيرجاسىنىڭ باسشىلىعىمەن ءبىرقاتار كەزدەسۋلەر وتكىزدى.