قازاقستاندا ءداستۇرلى جانە قازىرگى زامانعى قۇندىلىقتاردى زەرتتەۋ ورتالىقتارى قۇرىلادى، دەپ حابارلايدى Qamshy.kz اقپارات اگەنتتىگى ق ر ءدىن ىستەرى جانە ازاماتتىق قوعام مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.

2018 جىلعى 13 ساۋىردە ق ر مەملەكەتىك حاتشىسى گۇلشارا ءابدىقالىقوۆانىڭ توراعالىعىمەن قازاقستان رەسپۋبليكاسىنىڭ پرەزيدەنتى جانىنداعى جاستار ساياساتى جونىندەگى كەڭەسىنىڭ ءححى كەڭەيتىلگەن وتىرىسى ءوتتى. 

كەڭەس جۇمىسىنا ۇكىمەت مۇشەلەرى، ق ر پارلامەنتىنىڭ دەپۋتاتتارى، ەلىمىزدىڭ جاستار ۇيىمدارىنىڭ كوشباسشىلارى مەن جاستار ساياساتى سالاسىنداعى ساراپشىلار قاتىستى.

كۇن تارتىبىندە «رۋحاني جاڭعىرۋ» باعدارلاماسى اياسىندا قازىرگى قازاقستاندىق جاستاردىڭ قۇندىلىق ماقساتتارى مەن جاستار اراسىنداعى مادەني-بوس ۋاقىت قىزمەتتەرىن ءتيىمدى ۇيىمداستىرۋ ماسەلەلەرى قارالدى. 

وتىرىستى اشقان گ.ءابدىقالىقوۆا ەلباسى ن.ءا.نازاربايەۆتىڭ «جاس وتان» جاستار قاناتىنىڭ IV cەزىنە جولداعان قۇتتىقتاۋ سوزىندە جاستاردى جان-جاقتى دامۋعا – سپورتپەن، ونەرمەن اينالىسۋعا، شەت تىلدەرىن ۇيرەنۋگە، وتاندىق جانە الەمدىك ادەبيەتتىڭ باي مۇراسىن تانىپ-بىلۋگە، ەڭ باستىسى، الەمدىك دەڭگەيدەگى كاسىبي مامان بولۋعا شاقىرعاندىعىن اتاپ ءوتتى.

ءقازىر ەلىمىزدە ءۇشىنشى جاڭعىرۋ، «پرەزيدەنتتىڭ الەۋمەتتىك بەس باستاماسى» جۇزەگە اسىرىلىپ، يندۋستريا 4.0 ەلەمەنتتەرى ەنگىزىلىپ جاتقانىن اتاپ ءوتتى.

«ءبىز ءۇشىن باستىسى جاستاردىڭ تاريحقا، ۇلتتىق مادەنيەتكە، داستۇرگە قىزىعۋشىلىعىن وياتۋ. ول ءۇشىن ۇكىمەتتىك ەمەس ۇيىمدارمەن بىرلەسىپ، جاستارعا ارنالعان جوبالار ازىرلەپ، ءداستۇرلى قۇندىلىقتاردى قولداۋ مەن زەرتتەۋ ورتالىقتارىن اشۋ قاجەت»، – دەدى مەملەكەتتىك حاتشى.

كەڭەس وتىرىسى بارىسىندا ق ر ءدىن ىستەرى جانە ازاماتتىق قوعام ءمينيسترى دارحان كالەتايەۆ بايانداما جاساپ، ەل جاستارى پروگرەسسيۆتى رەفورمالار مەن جاڭاشىلدىقتاردىڭ نەگىزگى قوزعاۋشى كۇشى بولۋ قاجەتتىگىن جەتكىزدى. 

«رۋحاني جاڭعىرۋدى تابىستى جۇزەگە اسىرۋ ءۇشىن جاستار ونىڭ قۇندىلىقتارىن تولىعىمەن بويلارىنا ءسىڭىرىپ، كۇندەلىكتى ومىردە وعان ارقا سۇيەۋلەرى ءتيىس. ءبىزدىڭ مىندەتىمىز ولاردى بارىنشا تۇسىندىرۋگە كومەكتەسۋ، رۋحاني جاڭعىرۋدىڭ ءمان-ماعىناسىن قاراپايىم جانە قول جەتىمدى تۇردە جەتكىزۋ، ولاردى وزدەرىنە بەيىمدەۋ ءۇشىن قولداۋ كورسەتۋ بولىپ تابىلادى. جاستار ورتاسىندا «رۋحاني جاڭعىرۋ»  قۇندىلىقتارىن تاراتۋ جانە ونىڭ ماعىناسىن جەتكىزۋدىڭ ورتالىعى ءبىلىم بەرۋ مەكەمەلەرى مەن بۇقارالىق اقپارات قۇرالدارى بولۋى ءتيىس»، - دەدى مينيستر.

دارحان كالەتايەۆتىڭ ايتۋىنشا، «رۋحاني جاڭعىرۋ» كونتەكستىندە ءداستۇرلى جانە زاماناۋي قۇندىلىقتاردى زەرتتەۋ جانە ناسيحاتتاۋ ورتالىقتارى جاستارمەن قارىم-قاتىناس جاساۋدىڭ ءتيىمدى ارناسى بولادى. 

جاستاردىڭ مادەني جانە سپورتتىق نىساندارعا قولجەتىمدىلىگىن شەشۋ ءۇشىن ءدىن ىستەرى جانە ازاماتتىق قوعام مينيسترلىگى وتكەن جىلى بارلىق وبلىستاردا، استانا مەن الماتى قالالارىندا 2017-2020 جىلدارعا ارنالعان جاستاردىڭ بوس ۋاقىتىن وتكىزۋ تۋرالى جوسپارلارىن بىرلەسىپ قابىلداۋعا باستاما كوتەردى.  وتكەن جىلى وسى جوسپارلارعا سايكەس 379 جاڭا كوپ فۋنكسيونالدى نىساندار جانە 7 ساۋىقتىرۋ ورتالىقتارى پايدالانۋعا بەرىلدى. سونىڭ ىشىندە وڭتۇستىك قازاقستان وبلىسىندا جاڭادان قۇرىلعان نىسانداردىڭ سانى 178 بىرلىككە جەتتى.

كەڭەستىڭ كۇن ءتارتىبى اياسىندا مادەنيەت جانە سپورت ءمينيسترى ارىستانبەك مۇحامەدي ۇلى، وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ، «قازاقستان-2050» جالپىۇلتتىق قوزعالىسى كەڭەسىنىڭ ءتوراعاسى مۇحتار مانكەيەۆ، جۋرناليست-پۋبليسيست قانات اۋەسباي، كاسىپكەر جانبولات ماراتوۆ، «نۇر وتان» پارتياسىنىڭ «جاس وتان» جاستار قاناتىنىڭ ءتوراعاسى دانيار سۇندەتبايەۆ بايانداما جاسادى.

كەزدەسۋ سوڭىندا مەملەكەتتىك حاتشى مەملەكەتتىك ورگانداردىڭ باسشىلارىنا «رۋحاني جاڭعىرۋ» كونتەكستىندە ءداستۇرلى جانە قازىرگى زامانعى قۇندىلىقتاردى زەردەلەۋ جانە دامىتۋ ورتالىقتارىن قۇرۋ جانە ولاردى دامىتۋدى، سونداي-اق مەملەكەتتىك-جەكەمەنشىك سەرىكتەستىك تەتىكتەرىن بەلسەندى پايدالانۋ ارقىلى جاستاردىڭ بوس ۋاقىتىن ءتيىمدى  ۇيىمداستىرۋدى تاپسىردى.