بۇگىن شىمكەنت قالاسىندا ق ر ءدىن ىستەرى جانە ازاماتتىق قوعام ءمينيسترى دارحان كالەتايەۆ ستۋدەنتتەر جانە جاستار بەلسەندىلەرمەن كەزدەسۋ وتكىزدى.

مينيستر د.كالەتايەۆ ءوز سوزىندە ادامنىڭ نەگىزگى ومىرلىك قاجەتتىلىگىنە اينالاتىن جوعارى ءبىلىم الۋدىڭ ماڭىزدىلىعىن اتاپ ءوتتى.

ونىڭ پىكىرىنشە، تالاپكەرلەر وقۋ ورنىن جانە ماماندىعىن تاڭداۋ كەزىندە جوعارى ءبىلىم ورداسىنىڭ مارتەبەسىنە جانە تەگىن ءبىلىم الۋ مۇمكىندىگى سياقتى ماڭىزدى ولشەمدەرگە كوپ نازار اۋدارا بەرمەيدى.  

مينيستر بۇعان دالەل رەتىندە جاستاردىڭ قالايتىن ماماندىقتارىنا جۇرگىزىلگەن الەۋمەتتىك زەرتتەۋلەردىڭ دەرەكتەرىن كەلتىردى. تاڭداۋلى ماماندىقتار اراسىندا زاڭگەر (13%)، مەديسينا (10،5%)، ەكونوميكا (7،7%)، ديزاين (6،5%)، قارجى (5،9%)، كولىك (5،3%) سەكىلدى ماماندىقتار اتاپ وتىلەدى. «بولاشاقتىڭ ماماندىقتارى»، ونىڭ ىشىندە اقپاراتتىق تەحنولوگيالار (4،4%) باسىمدىققا يە ماماندىق قاتارىنا ەنبەيدى.

«بۇل پراگماتيزمنىڭ جوقتىعىن بىلدىرەدى. ءبىلىمدى تەگىن الۋعا مۇمكىندىك بولا تۇرا، سىزدەرگە قۇنى قىمبات جانە ەڭبەك نارىعىندا تالاپ ەتىلمەيتىن ءبىلىم ءۇشىن تولەماقى جاساتىپ، ءوز اتا-انالارىڭىزدى قارىزعا باتىرۋدىڭ قاجەتى نەدە؟»-دەپ كەزدەسۋگە جينالعان جاستارعا ساۋالىن جولدادى مينيستر دارحان كالەتايەۆ. 

مينيستر وتكەن وقۋ جىلىنان باستاپ مەملەكەت باسشىسىنىڭ باستاماسى بويىنشا «بارشاعا ورتاق تەگىن تەحنيكالىق جانە كاسىپتىك ءبىلىم» باعدارلاماسى باستالعانىن ەسكە سالىپ ءوتتى. سونداي-اق، 2017-2021 جىلدارعا ارنالعان ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسىنىڭ شەڭبەرىندە جۇمىسسىزداردى قايتا دايارلاۋ ءۇشىن جاقسى جاعدايلار جاسالعان. بۇدان بولەك،  اعىمداعى جىلدىڭ ناۋرىز ايىندا مەملەكەت باسشىسى ءوزىنىڭ «بەس الەۋمەتتىك باستاما» ۇندەۋىندە مەملەكەتتىك قولداۋ شارالارىن جاريالاعانى بەلگىلى.

«جاستار ساياساتى سالاسىندا قاتىسى بار جاستاردىڭ ەشقايسىسى نازاردان تىس قالمايدى. قاراپايىم وتباسىلاردان شىققان قازاقستاندا تابىسقا جەتكەن  بىرنەشە جاستاردى  مىسال رەتىندە ايتا الامىن»، - دەدى دارحان كالەتايەۆ.

ەستەرىڭىزگە سالا كەتەيىك، بۇگىن شىمكەنت قالاسىندا قازاقستان رەسپۋبليكاسىنىڭ پرەزيدەنتى جانىنداعى جاستار ساياساتى جونىندەگى كەڭەسىنىڭ ءححى وتىرىسى ءوتتى. شارادا «رۋحاني جاڭعىرۋ» باعدارلاماسى اياسىندا قازىرگى قازاقستاندىق جاستاردىڭ قۇندىلىق ماقساتتارى مەن جاستار اراسىنداعى مادەني-بوس ۋاقىت قىزمەتتەرىن ءتيمىدى ۇيىمداستىرۋ ماسەلەلەرى تالقىلاندى.