تاياۋدا وتكەن «جاس وتان» جاستار قاناتىنىڭ IV سەزى ەلىمىزدەگى جاستار ساياساتىنىڭ دامۋىنا تىڭ سەرپىن بەرگەنى ءسوزسىز. سوعان وراي ەل جاستارىنىڭ بەلسەندىلىگى ودان ءارى ارتىپ، قوعامداعى وزەكتى ماسەلەلەرگە قاتىستى ءوز پىكىرلەرىن ەركىن بىلدىرۋدە. بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆپەن كەزدەسكەن جامبىل وبلىسىنىڭ جاستارى ەلىمىزدىڭ كەمەل كەلەشەگى جولىندا ءوز ويلارىن اشىق ايتىپ، ۇتىمدى ۇسىنىستارىن جەتكىزدى، دەپ جازادى Qamshy.kz اقپارات اگەنتتىگى. 

ايتا كەتەيىك، بۇگىن ماۋلەن اشىمبايەۆ جامبىل وبلىسىنا ارنايى ساپارمەن باردى. ساپار بارىسىندا ول تاراز مەملەكەتتىك پەداگوگيكالىق ۋنيۆەرسيتەتىنىڭ وقىتۋشىلارىمەن جانە ستۋدەنتتەرىمەن كەزدەستى. ولاردىڭ اراسىندا جوعارىدا اتالعان «جاس وتاننىڭ» سەزىنە قاتىسقان دەلەگاتتار دا بار.

پارتيا ءتوراعاسىنىڭ ءبىرىنشى ورىنباسارى سەزدىڭ جاڭا باعىتتا، كرەاتيۆتى فورماتتا وتكەنىنە نازار اۋدارىپ، سول ارقىلى جاستاردىڭ ويى مەن پىكىرىن ەركىن بىلدىرۋگە جاعداي جاسالعانىن ايتتى.

سەزد اياسىندا وتكەن «رۋحاني جاڭعىرۋ»، «سيفرلى قازاقستان»، «قازاقستاندا جاسالعان»، «ءبىلىم. عىلىم. يننوۆاسيا» جانە «سالاماتتى ۇلت» تاقىرىبىنداعى 5 پانەلدى سەسسيا وتكەنى بەلگىلى. ناتيجەسىندە كوپتەگەن يگى باستامالار مەن ۇسىنىستار ايتىلعانىنا نازار اۋدارعان ماۋلەن اشىمبايەۆ پارتيا تاراپىنان جاستارعا ارنالعان جاڭا جوبالار قولعا الىنعانىن ايتتى.

– تالانتتى جاستار مەن اقپارات سالاسىنداعى ستارتاپتاردى قولداۋعا باعىتتالعان «Digital Nation»، تاجىريبەلى قازاقستاندىق ساياساتكەرلەر مەن ساراپشىلار ۇسىنعان ءتۇرلى باعىتتاعى ەڭ ۇزدىك كىتاپتاردىڭ ەلەكتروندى نۇسقالارى قويىلاتىن «Jas Otan Kitaphana»، سونداي-اق، شەتەلدىك جانە قازاقستاندىق جاس پەداگوگتاردى اۋىل مەكتەپتەرىندە جۇمىس ىستەۋگە شاقىراتىن «Teach for Kazakhstan» جوبالارى قولعا الىندى. وسى جوبالارعا جامبىلدىق جاستار دا بەلسەنە قاتىسادى دەپ سەنىم بىلدىرەمىن، – دەدى ماۋلەن اشىمبايەۆ.

ستۋدەنتتەرمەن كەزدەسۋىندە ماۋلەن اشىمبايەۆ «قازاق تىلىندەگى 100 جاڭا وقۋلىق» جوباسى اياسىندا جارىق كورىپ، كۇنى كەشە عانا قالىڭ وقىرمانعا جول تارتقان 18 وقۋلىق جايىنا دا ەرەكشە توقتالدى.

– الەۋمەتتىك جانە گۋمانيتارلىق سالادا الەمدىك شەديەۆر سانالاتىن ءارى دۇنيەجۇزىنىڭ ەڭ ۇزدىك جوعارى وقۋ ورىندارىندا وقىتىلاتىن وقۋلىقتاردىڭ قازاق تىلىنە اۋدارىلۋى، ءسوز جوق، مۋلتيپليكاتيۆتى اسەر بەرەتىن اۋقىمدى باستاما. قولىمىزعا تيگەن 18 وقۋلىقتىڭ قايسىسىن الىپ قاراساق تا وتاندىق عىلىمنىڭ دامۋىنا جانە ءبىلىم بەرۋ ءىسىنىڭ ودان ءارى جەتىلۋىنە ولشەۋسىز ۇلەس قوساتىن ەڭبەكتەر ەكەنىن اڭعارامىز. فيلوسوفيا، الەۋمەتتانۋ، پسيحولوگيا، ەكونوميكا، مەنەدجمەنت، كاسىپكەرلىك، ءدىنتانۋ، لينگۆيستيكا، مادەنيەتتانۋ، انتروپولوگيا، جۋرناليستيكا عىلىمدارىن قامتيتىن بۇل وقۋلىقتار جاستارىمىزدىڭ الەمدىك وزىق ۇلگىدە ءبىلىم الۋىنا داڭعىل جول اشىپ وتىر، – دەدى ماۋلەن اشىمبايەۆ.

سونىمەن قاتار پارتيا ءتوراعاسىنىڭ ءبىرىنشى ورىنباسارى جاستارعا «پرەزيدەنتتىڭ بەس الەۋمەتتىك باستاماسىنىڭ» ماڭىزى، ولاردىڭ جاس بۋىنعا بەرەر يگىلىگى جايىندا كەڭىنەن ءتۇسىندىرىپ بەردى.

ساپار بارىسىندا ماۋلەن اشىمبايەۆ «رۋحاني جاڭعىرۋ» وڭىرلىك جوبالىق كەڭسەسىنە ارنايى بارىپ، جامبىلدىق زيالى قاۋىم وكىلدەرىمەن كەزدەستى. بۇل كەڭسەدە ەلەكتروندى كىتاپحانا جانە ۆيرتۋالدى مۋزەيمەن جابدىقتالعان بەس بىردەي ينتەراكتيۆتى الاڭ جۇمىس ىستەيدى. باعدارلاما اياسىندا قولعا الىنعان «تاربيە جانە ءبىلىم»، «رۋحاني قازىنا»، «اتامەكەن» جانە «اقپارات تولقىنى» اتتى كىشى جوبالار بويىنشا وڭىردە اقتارىلعان جۇمىستار مەن جەتكەن جەتىستىكتەر جايىندا تىڭعىلىقتى مالىمەت الۋعا دا مۇمكىندىك بار.

– زيالى قاۋىم وكىلدەرى ەلباسى ايقىنداعان باعىت-باعداردىڭ جەتەكشىسى بولىپ، حالىققا «رۋحاني جاڭعىرۋ» باعدارلاماسىنىڭ ءمانىن ەگجەي-تەگجەيلى ءتۇسىندىرىپ وتىرۋلارى ءتيىس. بۇل باعدارلاما قازاقستان حالقىن بىرىكتىرىپ، ءبىزدىڭ بولاشاق جەڭىستەرىمىزدىڭ باعدارىنا اينالۋى كەرەك، – دەدى ماۋلەن اشىمبايەۆ.

سونداي-اق، پارتيا ءتوراعاسىنىڭ ءبىرىنشى ورىنباسارى وبلىس اكىمى اسقار مىرزاحمەتوۆپەن بىرگە «نۇرلى جەر» باعدارلاماسى بويىنشا سالىنىپ جاتقان كوپ پاتەرلى تۇرعىن ءۇي قۇرىلىسىمەن تانىستى. ودان بولەك، پارتيا وبلىستىق فيليالىنىڭ كەزەكتەن تىس XXI كونفەرەنسياسىنا قاتىسىپ، پارتيا الدىندا تۇرعان باسىم-باعىتتاردى پىسىقتادى.