بۇۇ قاۋىپسىزدىك كەڭەسى رەسەيدىڭ سيرياعا سوققى جاساۋعا قارسى بولىپ، ونى توقتاتۋعا شاقىرعان قارارىن قابىلدامادى، دەپ حابارلادى Qamshy.kz اقپارات اگەنتتىگى ريا نوۆوستي سايتىنا سىلتەمە جاساپ.

ەسكە سالساق، اقش، فرانسيا جانە ۇلىبريتانيا سيرياعا سوققى جاساعاننان كەيىن رەسەي سەنبىدە بۇۇ قاۋىپسىزدىك كەڭەسىنىڭ شۇعىل وتىرىسىن شاقىردى. 

ماسكەۋ «اقش پەن ونىڭ وداقتاستارىنىڭ سيرياعا قاتىستى اگرەسسياسىن» ايىپتايتىن قاراردىڭ جوباسىن تاراتتى. رەسەي قارارىنىڭ جوباسىندا «اقش پەن ونىڭ وداقتاستارىنان سيرياعا قاتىستى اگرەسسيانى دەرەۋ توقتاتۋدى، بۇۇ جارعىسى مەن حالىقارالىق قۇقىقتى بۇزاتىندىقتان ودان ءارى كۇش قولدانۋدى توقتاتۋدى» تالاپ ەتەدى.     

قاۋىپسىزدىك كەڭەسى وتىرىسى بارىسىندا قۇجاتقا داۋىس بەرىلدى. رەسەي، جۇڭگو جانە بوليۆيا جاقتاپ داۋىس بەردى. ال سەگىز ەل، ونىڭ ىشىندە  اقش، فرانسيا مەن ۇلىبريتانيا قارسى شىقتى. ءتورت ەل، ونىڭ ىشىندە قازاقستان داۋىس بەرۋ كەزىندە قالىس قالدى.  

ەسكە سالساق، اقش، بريتانيا مەن فرانسيا 14 ساۋىردە تاڭەرتەڭ سيريانىڭ ۇكىمەتتىك نىساندارىنا زىمىران سوققىلارىن جاسادى، ولاردىڭ پىكىرىنشە بۇل نىسانداردا حيميالىق قارۋ جاسالىپ جاتىر. ولار سيرياعا 100-دەن اسا زىمىران ۇشىردى، ونىڭ كوبىسىن سيريالىق اۋە شابۋىلىنا قارسى قورعانىس اسكەرلەرى اتىپ قۇلاتقان. رەسەيلىك كۇشتەر ارالاسقان جوق، الايدا بارلىعىن قاداعالاپ وتىردى.   

رەسەي پرەزيدەنتى ۆلاديمير پۋتين زىمىران سوققىلارىن ەگەمەن ەلگە قارسى اگرەسسيا دەپ اتادى.