قازاقستاندىق «ار.رۋح.حاق» قۇقىققورعاۋ ۇيىمىنىڭ جەتەكشىسى باقىتجان تورەعوجينا ءساۋىردىڭ 14ء-ى كۇنى Facebook الەۋمەتتىك جەلىسىندەگى پاراقشاسىندا «قازاقستانداعى ساياسي تۇتقىندار» ءتىزىمى تۋرالى باسپا ءسوز بايانىن جاريالادى. بۇل تۋرالى Qamshy.kz اقپارات اگەنتتىگى centralasian.org پورتالىنىڭ دەرەگىنە سۇيەنىپ حابارلايدى.

وندا جەرگىلىكتى «قۇقىققورعاۋشى ۇيىمداردىڭ ساراپتامالىق كەڭەسى» حالىقارالىق Amnesty International ۇيىمى مەن ەۋروپا كەڭەسى پارلامەنتتىك اسسامبلەياسى ولشەمدەرى نەگىزىندە ءساۋىردىڭ 4-ىندە قابىلداعان «قازاقستانداعى ساياسي تۇتقىنداردىڭ» جاڭارتىلعان ءتىزىمى بار.

بۇل تىزىمگە 2016 جىلى سوتتالعان قۇقىققورعاۋشىلار ماكس بوقايەۆ، تالعات ايان؛ 2017 جىلى سوتتالعان كاسىپوداق ليدەرلەرى ءامين ەلەۋسىنوۆ، نۇربەك قۇشاقبايەۆ؛ 2017 جىلى سوتتالعان ماحامبەت ءابجان، سانات بوكەنوۆ سەكىلدى قۇقىققورعاۋشىلار مەن جۋرناليستەر ت.ب. قوعام بەلسەندىلەرى كىرگەن.

قازاقستانداعى ساياسي تۇتقىنداردىڭ جاڭارتىلعان تىزىمىندە جەرگىلىكتى قۇقىققورعاۋشىلار بۇعان دەيىن دە ساياسي تۇتقىن نەمەسە ار-وجدان تۇتقىنى دەپ تانىعان ادامدار: 18 جىلعا سوتتالعان اقىن ءارى ديسسيدەنت ارون اتابەك (2006 جىلدان بەرى تۇرمەدە وتىر)؛ 2009 جىلى 14 جىلعا سوتتالعان «قازاتومونەركاسىبى» ۇلتتىق كومپانياسىنىڭ بۇرىنعى پرەزيدەنتى مۇحتار جاكىشيەۆ؛ 2012 جىلى 12 جىلعا باس بوستاندىعىنان ايىرىلعان قۇقىققورعاۋشى ۆاديم كۋرامشين؛ 2015 جىلى «ءدىني الاۋىزدىق قوزدىرعان» دەگەن ايىپپەن 4 جىل 8 ايعا سوتتالعان ساكەن تۇلبايەۆ بار.

ساراپتامالىق كەڭەسكە قاتىسقان قۇقىققورعاۋشى امانگەلدى شورمانبايەۆتىڭ ايتۋىنشا، كەڭەس وتىرىسى ءساۋىردىڭ 4ء-ى كۇنى قازاقستاننىڭ ادام قۇقىعىن قورعاۋ جونىندەگى بيۋروسىنىڭ كەڭسەسىندە وتكەن. شورمانبايەۆ قازاقستانداعى ساياسي تۇتقىندار ءتىزىمىن تۇزگەن كەزدە حالىقارالىق قۇقىققورعاۋ ۇيىمدارىنىڭ ولشەمدەرى ەسەپكە الىنعانىن قۇقىققورعاۋشى رەتىندە عانا ەمەس، سونىمەن بىرگە زاڭگەر رەتىندە راستايتىنىن ايتتى.