بۇگىن قوعام بەلسەندىسى، مەدياتۇلعا، بەلگىلى جۋرناليست بەرىك ءۋالي جۇرگىزىپ وتىرعان ۇلتتىق ارناداعى «ءبىرىنشى ستۋديا» باعدارلاماسىنىڭ ەفيرگە شىققانىنا ءبىر جىل تولدى، دەپ حابارلايدى Qamshy.kz اقپارات اگەنتتىگى. وسى ۋاقىت ىشىندە كورەرمەندەر بەرىك ءۋاليدىڭ تەلەجوباسىن 42 رەت تاماشالاپتى.

اپتاسىنا ءبىر رەت شىعاتىن باعدارلاماعا ءار سالانىڭ ماماندارى قاتىستى. ونىڭ قاتارىندا لاۋازىمدى مەملەكەت قىزمەتكەرلەرى، تانىمال كاسىپكەرلەر، ۇلت عىلىمىنا قىزمەت ەتىپ جۇرگەن عالىمدار مەن ساراپشىلار بار. تەلەجوبادا بيلىك وكىلدەرىمەن قاتار ەلىمىزدەگى تانىمال وپپوزيسيا بەلسەندىلەرى دە بوي كورسەتتى. ستۋديا قوناقتارى بۇگىنگى قوعامداعى كوپتەن قوردالانعان وزەكتى ماسەلەلەردى بايىپپەن، بىلگىرلىكپەن جان-جاقتى تالقىلاپ، پىكىر ءبىلدىرىپ جاتتى. ال بۇل ءوز كەزەگىندە پايدالى بولعانى ءسوزسىز.

سونىمەن بىرگە ەلباسىنىڭ «بولاشاققا باعدار: رۋحاني جاڭعىرۋ» اتتى  ماقالاسىنداعى ءبىرقاتار ساياسي-الەۋمەتتىك ماڭىزى بار بولىمدەرى، ونىڭ ىشىندە لاتىن قارپىنە كوشۋ، كيەلى ولكەلەر ءتىزىمى، ۇلتتىق سانا تاقىرىبى اياسىنداعى ماسەلەلەر ايتىلدى. وپپوزيسيا وكىلدەرى مەن مەملەكەت قىزمەتكەرلەرى وي جارىستىرىپ، كورەرمەن كوزقاراسىنا قوزعاۋ سالدى.

بيلىكتىڭ باقىلاۋىنداعى تەلەارنادا مۇنداي وزەكتى تاقىرىپتاردىڭ كەڭىنەن تالقىلانۋى مەملەكەتتىك ماڭىزى بار شەشىمدەردى قابىلداۋدا ءبىرجاقتىلىقتان ساقتادى.

«ءبىرىنشى ستۋديا» قوناقتارىنىڭ اركەلكى قۇرامى، ونداعى سپيكەرلەردىڭ ءار تاراپتان كەلگەنى، ءارتۇرلى كوزقاراستاعى ازاماتتار بولۋى كورەرمەن قىزىعۋشىلىعىن ارتتىرا ءتۇستى. بۇل ءوز كەزەگىندە قازاق ساياسي-اقپاراتتىق كەڭىستىگىن شەتەلدىك ىقپالدان تازالاۋعا مۇمكىندىك بەرەدى. قوعامداعى كوكەيكەستى ماسەلەلەردى تالقىلاۋعا وپپوزيسيا وكىلدەرىن تارتۋ ءپليۋراليزمنىڭ دامۋىنا سەپتىگىن تيگىزەتىنى انىق.

ابىلاي سارسەنبايەۆ