تۇركىمەنستاندا ەندى جاسى وتىزعا تولماعان ەر ازاماتتار شەتەلگە شىعا المايدى دەپ حابارلادى داشوگۋس وبلىسىنداعى ميگراسيا قىزمەتىنىڭ وكىلى ازاتتىقتىڭ تۇركىمەن قىزمەتىنە.
دەرەككوزدىڭ مالىمەتىنە قاراعاندا، شەنەۋنىكتەر مۇنداي شەشىم ازاماتتاردىڭ قاۋىپسىزدىگىنە بايلانىستى قابىلدانىپ وتىر دەگەن.
«شەتەلگە شىقپاق بولعان مەنىڭ 27 جاسىمداعى تانىسىمدى وبلىستىق ميگراسيا قىزمەتى شاقىرىپ الىپ، ونىڭ جول بيلەتىن تارتىپ الدى. وعان اشحابادتان جاسى وتىزعا تولماعانداردى شەتەلگە جىبەرمەي تۋرالى بۇيرىق كەلگەنىن ايتقان»، - دەيدى دەرەككوز.
ونىڭ سوزىنشە، تانىسىنا بيلەتتىڭ قۇنىن وتەپ بەرگەن.
سوڭعى ايلاردا ازاماتتاردىڭ تۇركياعا شىعۋى قيىنداپ كەتكەن. سونىمەن بىرگە شەتەلدە جۇمىس ىستەپ جۇرگەن ازاماتتار مەن وقىپ جۇرگەن ستۋدەنتتەردى ەلگە قايتارۋ ماسەلەسى ءقازىر قولعا الىنعان كورىنەدى.
