اقتوبەدەگى №38 مەكتەپتە 5-سىنىپ وقۋشىسى ديلناز ابىشيەۆا كوز جۇمدى. وقۋشى قىزدىڭ جاعدايى ساباق ۇستىندە ناشارلاي باستاعان. مۇعالىمدەر جەدەل جاردەمگە 18 مارتە حابارلاسقان، الايدا دارىگەرلەر كەلمەدى. اۋرۋحاناعا جەتكەن بويدا قىز جان تاپسىردى. بۇل تۋرالى «دياپازون» جازدى.

قايعىلى وقيعا بولعان كۇنى قىز بالا ادەتتەگىدەي مەكتەپكە جينالعان. سيرككە بارۋ ءۇشىن اتا-اناسىنان اقشا سۇراپ الدى. كەلەسى كۇنى ۇيگە قىزدىڭ ءولى دەنەسى قايتتى.

«بۇل وقيعا كۇننىڭ ەكىنشى جارتىسىندا بولدى. بەسىنشى ساباقتا قىزدىڭ جاعدايى ناشارلاي باستادى. جەدەل جاردەمگە 18 رەت حابارلاستىق. كەلمەگەندىكتەن، مۇعالىمدەر كوشەگە شىعىپ، كولىكتى وزدەرى توقتاتتى. ءبىراق قىزدان ايىرىلىپ قالدىق. ول بۇعان دەيىن دە اۋىرعان ەكەن. ۇيىندە دە ەسىنەن تانىپ قۇلاپتى. مۇنداي جاعداي سىنىپتا دا بولدى. دارىگەر وعان شاي مەن سۋ بەرىپ، ۇيىنە جىبەرگەن. گەموگلابينى تومەندەگەن ەكەن، جۇرەك تالماسى ۇستاپ قالاتىن. ءبىز اتا-اناسىنا كوڭى ايتىپ، ماتەريالدىق تۇرعىدان كومەك كورسەتتىك. وتە وكىنىشتى. ديلناز سالماقتى قىز بولاتىن، ساباعىن دا جاقسى وقىدى»، - دەدى وقۋ ءىسىنىڭ مەڭگەرۋشىسى بيماش تىلەۋبەرگەنوۆا.

الدىن الا دەرەكتەر بويىنشا، قىزدىڭ جۇرەگى توقتاپ قالعان. الايدا اناسى ديلنازدىڭ اۋرۋعا ەشقاشان شاعىمدانباعانىن ايتادى.

«ديلناز اكەسىن ەمدەگەندى جاقسى كورەتىن. دارىگەر بولۋدى ارماندادى. ول اۋىرعان جوق. دەنساۋلىعىندا اقاۋ بولماعان. دارىگەرلەردىڭ ءوزى تۇسىنە المادى. ساراپتاما ناتيجەلەرى دە قىزدىڭ ورگاندارى قالىپتى ەكەنىن كورسەتىپ وتىر. اياق استىنان جۇرەگى توقتاپ قالعان. ناقتى سەبەبىتەك ءبىر ايدان كەيىن بىلە الامىز. اناليزدەرىن الماتىعا جىبەردىك. سول كۇنى ديلنازدىڭ ءمۇعالىمى حابارلاسىپ، قىزىمنىڭ جاعدايى ناشارلاپ جاتقانىن ايتتى. جۇمىستان بىردەن مەكتەپكە اتتاندىم. بالالاردىڭ ءبارى سىرتتا تۇردى. ديلناز سىنىپ ىشىندەگى پارتادا جاتتى. مەنىڭ كوزىمشە مەدبيكەلەر قىزدىڭ ومىرىمەن ارپالىسىپ جاتتى. قىزىم تىنىس العاندا قاتتى قۋانعان ەدىم. ءبىراق اۋرۋحانادا قايتىس بولعانىن ايتتى. كەش جەتكىزگەن ەكەنبىز»، - دەدى قىزدىڭ اناسى زاۋرەش.