الماتى قالاسىندا «رۋحاني جاڭعىرۋ» باعدارلاماسى اياسىندا «عىلىم ورداسى» عيماراتىندا قازاقستان رەسپۋبليكاسىنىڭ عىلىمي قىزمەتكەرلەرى كۇنىنە ارنالعان سالتاناتتى جيىن ءوتتى. بۇل جايىندا Qamshy.kz اقپارات اگەنتتىگى الماتى اقشامى گازەتىنە سىلتەمە بەرىپ حابارلايدى.

وعان قازاقستاننىڭ اكادەميكتەرى مەن بەلگىلى عالىمدارى، جوعارى وقۋ ورىندارى مەن عىلىمي ۇيىمداردىڭ، ۇلتتىق جانە ۇجىمدىق قولدانىستاعى ينجەنەرلىك زەرتحانالاردىڭ باسشىلارى، جاس عالىمدار قاتىستى.

سالتاناتتى جيىندى ۇلتتىق عىلىم اكادەمياسىنىڭ پرەزيدەنتى، اكادەميك م.جۇرىنوۆ اشىپ، عىلىمي قوعامداستىقتى ءتول مەرەكەسىمەن قۇتتىقتادى.  قر-نىڭ ءبىلىم جانە عىلىم ۆيسە-مينيسترى ت.ەشەنقۇلوۆ زيالى قاۋىمعا مينيستر ە.ساعادييەۆتىڭ قۇتتىقتاۋ سالەمدەمەسىن جەتكىزدى. سونىمەن قاتار عىلىمنىڭ بۇگىنگى جاي-كۇيى مەن ونىڭ دامۋ بولاشاعى تۋرالى باياندادى.

اتالمىش ءىس-شارادا ءسوز العان عالىمدار ءوز كەزەگىندە ەلباسىنىڭ عىلىمدى قاجەتسىنەتىن ەكونوميكانى دامىتۋ، قوعامدىق سانانى رۋحاني جاڭعىرتۋ جانە قازاقستان عىلىمىن  زاماناۋي دەڭگەيگە شىعارۋ باعىتىنداعى ساياساتىنا قولداۋشىلىق تانىتتى.

القالى جيىندا عىلىمنىڭ دامۋىنا زور ۇلەس قوسقان عالىمدارعا ق ر بعم-نىڭ ۆەدومستۆولىق ماراپاتتارى، قۇرمەت گراموتالارى مەن العىس حاتتارى تابىستالدى.

قر-نىڭ ءبىلىم جانە عىلىم مينيسترلىگى مەن «قازاقستان يپوتەكالىق كومپانياسى» اق-نىڭ بىرلەسكەن جوباسى اياسىندا، «نۇرلى جەر» تۇرعىن ءۇي قۇرىلىسى باعدارلاماسى بويىنشا الماتى قالاسىندا ورنالاسقان عىلىمي-زەرتتەۋ ينستيتۋتتارىنىڭ جاس عالىمدارىنا 120 پاتەر ءبولىندى. جاستارعا الەۋمەتتىك قولداۋ كورسەتۋ ماقساتىندا جالعا بەرىلەتىن بۇل پاتەرلەردى ولاردىڭ بولاشاقتا ساتىپ الۋ مۇمكىندىگى بار.

وسى باسقوسۋدا 7 جاس عالىمعا پاتەر كىلتى تابىس ەتىلدى.