وزبەكستاننىڭ حورەزم وبلىسى كاسىبي اۆتوجول كوللەدجىنىڭ بيولوگيا ءپانىنىڭ وقىتۋشىسى زەبو نافاسوۆا وقۋشىعا كۇش قولدانعانى ءۇشىن قىزمەتىنەن الىنعان.
الەۋمەتتىك جەلى ارقىلى تاراپ كەتكەن ۆيدەودا وقىتۋشى زەبو نافاسوۆا ستۋدەنتتەردىڭ كوزىنشە، 17 جاستاعى مۇحامماد جۋمانازاروۆتى اياق كيىمىمەن ۇرادى. تەكسەرۋ بارىسىندا بۇل ۆيدەونىڭ 12 ساۋىردە تۇسىرىلگەنى انىقتالعان.
ورتا ارنايى كاسىبي ءبىلىم بەرەتىن وقۋ ورنىنىڭ قىزمەتكەرى سالوحيددين ساناكۋلوۆ بۇل وقيعادان كەيىن وقىتۋشى زەبو نافاسوۆا قىزمەتىنەن الىندى دەپ حابارلادى.
جابىرلەنۋشىنىڭ تۋىسى ونىڭ اناسى وقىتۋشىنى كىنالامايتىنىن ايتادى. «ونىڭ ويىنشا، ءمۇعالىم ادام بولسىن دەپ ىستەگەن»، – دەيدى ءجابىر كورگەن وقۋشىنىڭ تۋىسى.
حورەزم وبلىسىنداعى ايەلدەر ءىسى جونىندەگى كوميتەت قىزمەتكەرى زەبو نافاسوۆانىڭ سوڭعى كەزدە قاتتى كۇيزەلىستە جۇرگەنىن ايتادى.
«بىرنەشە كۇن بۇرىن ونىڭ كۇيەۋىن ەسىرتكى ساقتادى دەگەن ايىپپەن ۇستاپ اكەتكەن. ءقازىر ول تەرگەۋ اباقتىسىندا. زەبو نافاسوۆانى دا تەرگەۋشىلەر ۇنەمى سۇراۋعا الىپ، كۇيزەلىسكە ءتۇسىردى. ءبىراق كەز-كەلگەن جاعدايدا، ول ستۋدەنتتەرگە قول كوتەرمەۋى ءتيىس ەدى»، – دەيدى ايەلدەر ءىسى جونىندەگى كوميتەت قىزمەتكەرى.
پىكىر قالدىرۋ