ق ر ىشكى ىستەر مينيسترلىگى ۇيالى تەلەفون ۇرلىعىمەن بايلانىستى قىلمىستاردى اشۋدا كەزدەسەتىن كەدەرگىلەردى اتادى، دەپ حابارلايدى قازاقپارات.
«تەلەفون ۇرلىعىن اشۋداعى نەگىزگى پروبلەما - ول ازاماتتاردىڭ پوليسياعا كەش جۇگىنۋىنە بايلانىستى. سونىمەن قاتار ازاماتتاردىڭ ۇستالعان ۇيالى تەلەفونداردى ساتىپ الۋى، ولاردىڭ موبيلدىك قۇرىلعى IMEI-كودىن بىلمەۋى، مۇلىككە قۇقى بار قۇجاتتاردىڭ بولماۋى سەكىلدى جاعدايلار قىلمىستىڭ اشىلۋىن كەشىكتىرەدى»، - دەپ اتالىپ وتكەن ءىىم-نىڭ «قازاقپاراتتىڭ» رەسمي ساۋالىنا بەرگەن جاۋابىندا.
بۇدان بۇرىن حابارلانعانداي، بيىل اقپان ايىندا ق ر اقپارات جانە كوممۋنيكاسيالار ءمينيسترى داۋرەن ابايەۆ قازاقستاندا ۇيالى تەلەفون ۇرلىعىن ازايتۋدىڭ شارالارى تۋرالى ايتتى.
«تاجىريبە كورسەتىپ وتىرعانداي، ۇيالى تەلەفوندى IMEI-كود ارقىلى تابۋ مۇمكىن بولماي وتىر. بۇدان بولەك، نارىقتا IMEI-كودى بىردەي ۇيالى تەلەفوندار دا كەزدەسەدى. بۇل ماسەلەنى قۇرىلعىنىڭ IMEI-كودىن يەسىنىڭ جسن-ى مەن ابونەنت نومىرىنە بايلانىستىرۋ ارقىلى عانا شەشۋگە بولادى. تەلەفون وسىلاي تىركەلگەن كەزدە، ۇيالى تەلەفوندى ۇرلاۋ مۇلدەم ءتيىمسىز بولادى»، - دەدى داۋرەن ابايەۆ.
