وتكەن اپتانىڭ سوڭىندا اديليام ۋشۋروۆا اتتى قولدانۋشىنىڭ اتىنان قازاقتاردىڭ ار-نامىسىنا تيەتىن پىكىر جازىلعان سكرينشوت جەلىدە تاراپ كەتكەن ەدى. ءبۇتىن ءبىر ۇلتتى "مامبەتتەر" دەپ كەمسىتكەن، "سەندەردى تاۋعا قۋىپ جىبەرىپ، مالدىڭ تەزەگىن جەگىزۋ كەرەك" دەگەن سوزدەر قوعامدا قاتتى تالقىلاندى.

Qamshy.kz اقپارات اگەنتتىگى قۇزىرلى ورىنداردان ءىستىڭ انىق-قانىعىنا جەتۋدى تالاپ ەتكەن ەدى.

بۇگىن Facebook الەۋمەتتىك جەلىسىندە ءوزىن اديليام ۋشۋروۆا دەپ تانىستىرعان ادام ۆيدەوۇندەۋ جاساپ، ەلگە ءمان-جايدى ءتۇسىندىردى. جىلامسىراپ وتىرىپ سويلەگەن سوزىندە اديليام ۋشۋروۆا ول پىكىردى ءوزى جازباعانىن، بەلگىسىز بىرەۋ اككاۋنتىن بۇزىپ كىرگەنىن ايتادى.

«مەن، ۋشۋروۆا اديليام. قازاقستان ازاماتتارى! مەنى تۇسىنۋلەرىڭىزدى سۇرايمىن! مەن ول پىكىردى جازعان جوقپىن. بىرەۋ مەنىڭ اككاۋنتىمدى بۇزىپ كىرىپ، جوقتان وزگەنى جازىپتى. ونى مەن جازعان جوقپىن. مەن قالاي جازامىن؟ كۇيەۋ بالام – قازاق، جەڭگەم، قۇداشام – ءبارى قازاق. قازاقتاردىڭ اراسىندا جۇمىس ىستەيمىن.

مەن ەگدە جاستاعى ايەلمىن. سىزدەر قالايشا سونى مەن جازدى دەپ ويلايسىزدار؟ ماعان ءتىل تيگىزىپ، قورقىتىپ، فوتوسۋرەتتەرىمدى جان-جاققا تاراتتىڭىزدار. ءبىراق ونى مەن ىستەمەدىم. نەمەرەلەرىم قازاقشا سويلەيدى. حالايىق، مەنى كەشىرىڭىزدەر! مەن قالاي سىزدەرگە اقتالا الامىن؟ تۋىستارىم مەن دوستارىم دا ماعان: "سەن نە جازعانسىڭ؟"، — دەپ جاتىر. ونداي بىلجىراقتى جازاتىن مەن سونشالىقتى اقىماقپىن با؟ ەگەر شىنىمەن جازعىم كەلسە، ءبىرىنشى كەزەكتە تۋىستارىمنىڭ – نەمەرەلەرىمنىڭ، اكە-شەشەمنىڭ سۋرەتىن وشىرەر ەدىم.

قازاقستان حالقى! بۇل – مەنىڭ ءىسىم ەمەس. بىرەۋ اككاۋنتىمدى بۇزعان. قالاي تۇسىنسەڭىزدەر، ولاي تۇسىنىڭىزدەر. سونى جازباعانىم ءۇشىن مەنى كەشىرىڭىزدەر»، — دەدى اديليام ۋشۋروۆا.