الماتىدا بيىل جازدا 12 شاقىرىمنان استام جىلۋ جۇيەلەرى قايتا جاسالادى. قازىرگى كەزدە دايىندىق جۇمىستارى جۇرۋدە، ال 10 مامىردان قالانىڭ جەتى كوشەسىندە كولىك قوزعالىسىن سەگمەنتتىك شەكتەۋ باستالادى. الداعى ۋاقىتتا ينجەنەرلىك جەلىلەردى جوندەۋ جۇمىستارىنا وراي وتكەن كەڭەيتىلگەن جيىندا الماتى اكىمى باۋىرجان بايبەك جايسىزدىقتى بارىنشا ازايتۋ ءۇشىن ۋاقىتشا سىزبالار ارقىلى قالا تۇرعىندارىن جىلى سۋمەن تۇراقتى قامتاماسىز ەتۋدى تاپسىردى.

بيىلعى جىلى جىلۋ جۇيەلەرىن مودەرنيزاسيالاۋ جۇمىستارى بوگەنباي باتىر، (مۇقانوۆ/ايتييەۆ)، جامبىل (پۋشكين/نازاربايەۆ)، قازىبەك بي (ءۋاليحانوۆ/ابدۋلليندەر)، قاراساي باتىر (ناۋرىزباي باتىر/چايكوۆسكيي)، تولە بي (ۆارلاموۆ/وتەگەن باتىر/وتار)، چايكوۆسكيي (قاراساي باتىر/تولە بي) جانە شاگابۋتدينوۆ (قۇرمانعازى/ورتالىق ستاديون) كوشەلەرىندە جۇرەدى.

الماتى اكىمىنىڭ ورىنباسارى الماس مادييەۆ ءوزىنىڭ سوزىندە قازىرگى كەزدە ءار ۋچاستوك بويىنشا ناقتىلى كەستە جاسالعانىن، تەحنيكا مەن جۇمىسشىلارىنىڭ سانىنىڭ انىقتالعاندىعىن ايتتى. قايتا جاسالاتىن بارلىق وبەكتىلەردە مەردىگەرلىك ۇيىم تۋرالى اقپارات بار پاسپورت، ءتيىستى جول بەلىگلەرى بولادى جانە جۇرگىنشىلەر ءۇشىن قورشاۋلار قويىلادى.

ول كوپتەگەن نىسانداردا رەكونسترۋكسيالاۋدى شىلدە ايىنىڭ سوڭىندا اياقتاۋدىڭ جوسپارلانعانىن، ال كەيبىر كۇردەلى جانە ۇزىن ۋچاسكەلەردە جۇمىستىڭ تامىز ايىندا بىتەتىنىن ايتتى. جۇمىس بارىسىندا جاقىن ورنالاسقان ايماق مىندەتتى تۇردە اباتتاندىرىلادى.

ەنەرگەتيكا جانە كوممۋنالدى شارۋاشىلىق باسقارماسى بۇرىن جوندەلگەن ۋچاسكەلەردىڭ جول جيەكتەرىندەگى توپىراقتىڭ شوگۋىن زەرتتەۋدى باستادى، ولار كەپىلدى مىندەتتەمە رەتىندە مەردىگەر ارقىلى قالپىنا كەلتىرىلەدى.

ايتا كەتەرلىگى، الماتىدا 2018 جىلى 157 كوشەنى جوندەۋ جوسپارلانعان.الماتى رەكونسترۋكسياسى اياسىندا قالانىڭ ءبىرقاتار ماڭىزدى داڭعىلدارى جاڭارادى، سونىڭ ىشىندە اباي، ابلاي حان، نازاربايەۆ داڭىعلدارى جانە باسقالارى بار. بۇرىن جوندەلگەن 455 اۋلا الاڭدارىنا قوسا بيىل قالانىڭ بارلىق اۋداندارىندا تاعى 585 اۋلا جاڭارادى.