بيىل الماتى مارافونىندا 14 مىڭنان اسا ادام جۇگىرەدى. سپورتتىق شاراعا شەتەلدەن ارنايى كەلىپ قاتىساتىندار دا بار ەكەن. ۇيىمداستىرۋشىلار شاراعا ءتاس-تۇيىن دايىنبىز دەيدى. قاتىسۋشىلار 42 شاقىرىمدى ەڭسەرۋلەرى كەرەك. مارافون رەسپۋبليكا الاڭىنان باستالىپ، ءدال وسى جەردە اياقتالادى.
ەۆگەنيي كارابينسكيي الماتى مەن كييەۆ اراسىندا جۇمىس ىستەيدى. ەرتەڭگى مارافونعا قاتىسۋ ءۇشىن ارنايى كەلىپتى. اپتاسىنا 3-4 كۇن جاتتىقتىرۋشىسىمەن جۇگىرەدى. ول 21 شاقىرىمدى ەڭسەرمەكشى. ايتۋىنشا، كاسىپقوي سپورتشى بولماعاننان كەيىن تولىق جۇگىرۋ قيىنعا سوعادى. بيىل اتالعان شاراعا 3 جىل قاتارىنان قاتىسىپ جاتىر ەكەن. الماتىداعى بۇقارالىق سپورت جىلدا جوعارى دەڭگەيدە ۇيىمداستىرىلادى، دەيدى ول.
«الماتى مارافون وتە جوعارى دەڭگەيدە وتەدى. جىل سايىن قاتىسۋشىلاردىڭ سانى ارتىپ كەلەدى. سونىمەن قاتار، قالا تاۋلى جەردە ورنالاسقاننان كەيىن قيىندىقتار كوپ. مەن 21 شاقىرىم جۇگىرەم دەپ جوسپارلاپ وتىرمىن»، - دەدى ەۆگەنيي كارابينسكيي.
مارافونعا 14 مىڭ ادام رەسمي تىركەلگەن. ۇيىمداستىرۋشىلاردىڭ سوزىنشە، بىلتىر 13 مىڭعا جۋىق ادام قاتىسىپتى. بۇقارالىق سپورتقا قىزىعاتىندار سانى جىل ساناپ ارتىپ كەلەدى ەكەن.
«وسى دەمالىستا ەڭ ءىرى شارالارىمىزدىڭ ءبىرى - الماتى مارافونى وتپەك. ازياداعى اۋقىمدى سپورتتىق مەرەكە بولماق. ءبىزدىڭ قالا وعان ءتاس-تۇيىن دايىن. بيىل قاتىسۋشىلاردىڭ دا سانى بىلتىرعىدان قاراعاندا كوپ. رەسمي تىركەلگەندەردىڭ سانى 14 مىڭنان اسىپ جىعىلادى. مارافون كەزىندە وتكەن جىلداعىداي ادامدار تاعى قوسىلادى دەگەن ويدامىز»، - دەدى الماتى قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى رۇستەم بايسەيىتوۆ.
مارافوننىڭ جالپى ۇزىندىعى 42 شاقىرىم. ول 5 قاشىقتىققا بولىنگەن ەكەن. قاتىسۋشىلارعا بارلىق جاعداي جاسالعان. ءتىپتى، جولدا بەرىلەتىن تاعامداردىڭ تۇرلەرى دە كوبەيگەن. ايتا كەتەيىك، مارافوننان جينالعان قارجى قايىرىمدىلىققا جىبەرىلەدى.
«وسى جىلى ءبىز جينالعان قاراجاتتى قايىرىمدىلىققا جىبەرەمىز. ول اقشا 3 مەكتەپ پەن 3 ليسەيگە سپورتتىق الاڭدار سالىنۋىنا جۇمسالادى. سونىمەن قاتار، سپورتتىق جابدىقتار ساتىپ الىنادى. تاعى ءبىر ايتا كەتەرلىگى، بيىلعى مارافونعا قاتىسۋشىلاردىڭ تاعام تۇرلەرىن كوبەيتتىك. ياعني، بىلتىر تەك جەمىس-جيدەكتەر عانا بولسا، وسى شارادا شوكولادتار مەن تاتتىلەر قوسىلدى. ۇزاققا جۇگىرەتىندەرگە ارنايى ماسساج دا قاراستىرىلدى»، - دەدى الماتى مارافونىنىڭ وپەراسيالىق ديرەكتورى قۇرالاي ەرمەكبايەۆا.
الماتى مارافونىنان بولەك 6-7 مامىردا «Tengri Ultra» مارافون وتەدى. بۇل سپورتتىق شارانىڭ ەرەكشەلىگى - قاتىسۋشىلار تاۋلى ايماقتاردا جۇگىرەدى. مۇنداي بۇقارالىق سپورت الماتى وبلىستارىندا ۇيىمداستىرىلادى. قالالىق سپورت باسقارماسىنىڭ وكىلدەرى، «Tengri Ultra» مارافونعا قىزىعاتىندار دا از ەمەس دەيدى.
«بۇل سپورتتىق شارا الماتى وبلىسى، تاڭبالى تاستىڭ اۋماعىندا وتەدى. وعان كوبىنە اۋەسقوي مارافونشىلار قاتىسادى. ياعني، تاۋلى جەرلەردە جۇگىرۋدى جانى سۇيەتىندەر بولادى»، - دەدى الماتى قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى رۇستەم بايسەيىتوۆ.
سپورتتىق شارالاردى ۇيىمداستىرۋشىلاردىڭ سوزىنشە، الماتىدا سالاۋاتتى ءومىر سالتىن ۇستانۋعا بارلىق جاعداي جاسالعان. وعان دالەل، ۆەلوجولاقتار مەن دەنە شىنىقتىرۋمەن اينالىساتىن الاڭدار. سپورتتىق شارالاردىڭ اشىلۋىن وتكەن اپتادا قالا اكىمى باۋىرجان بايبەك ۆەلوشەرۋمەن اشىپ بەرگەن بولاتىن. بيىل 21 ۆەلوشەرۋ وتكىزۋ جوسپارلانىپتى. جالپى، 3 مىڭنان اسا سپورتتىق شارالار 2018 جىلى ۇيىمداستىرىلادى.
پىكىر قالدىرۋ