الماتىدا قالانىڭ كوركىن بۇزعان سۇرىقسىز گاراجدار ءسۇرىلىپ جاتىر.

الماتىدا قالانىڭ كوركىن بۇزعان سۇرىقسىز گاراجدار ءسۇرىلىپ جاتىر. ويتكەنى، قويمالاردىڭ كوبىسى يەسىز قالعان. ال وزدەرىن «كولىكجايدىڭ قوجايىنىمىز» دەپ تانىستىراتىنداردىڭ قولىندا ءتيىستى قۇجاتى جوق. تازالىق ساقشىلارى ءبىر عانا اۋەزوۆ اۋدانىنان 200-دەن استام ەسكىرگەن تەمىر گاراجدى انىقتاپتى. ەندى ەكولوگتار كوپ كۇتتىرمەي، ولاردىڭ بارلىعىن بۇزىپ تاستاماق.

ءىشى-سىرتى توت باسىپ، ابدەن توزىعى جەتكەن بۇل تەمىر گاراجدار كەزىندە ەڭبەك جانە سوعىس ارداگەرلەرىنە بەرىلگەن. ءقازىر قويمالار قاراۋسىز قالعان. ءبىرىنىڭ قوجايىندارى باياعىدا قايتىس بولسا، ال كەيبىرىنىڭ يەلەرى تاستاپ كەتكەن. ەندى ەكولوگتار بۇل گاراجداردى ءسۇرىپ تاستاۋعا نيەتتەنىپ وتىر. ويتكەنى، سۇرىقسىز كولىكجايلار قالا كوركىن بۇزعانى ءوز الدىنا، قوبىرسىعان قوقىستىڭ ورداسىنا اينالىپ كەتىپتى. جاۋاپتىلار «اقساي» ىقشاماۋدانىنداعى 4 قويمانى جەرمەن جەكسەن ەتتى.

«بۇل ماڭداعى گاراجدار 90-شى جىلداردىڭ باسىنان بەرى تۇر. قازىرگى ۋاقىتتا كوبىسىنىڭ يەسى جوق. ال قويمالاردى جالعا الۋشىلاردىڭ ءتيىستى قۇجاتتارى جوق. بارلىعىن تەكسەرىپ، شەتىنەن بۇزىپ جاتىرمىز. ويتكەنى، گاراجدار قالانىڭ كوركىن كەتىرىپ، اينالاسى قوقىسقا تولىپ كەتكەن»،-دەدى الماتى قالاسى اۋەزوۆ اۋدانى ەكولوگيا ءبولىمىنىڭ باسشىسى عاليا تولەگەنوۆا.

جەرگىلىكتى تۇرعىندار سۇرىقسىز گاراجداردىڭ ءسۇرىلۋىن اسىعا كۇتكەن ەكەن. ولار قاراۋسىز قالعان قاڭىلتىرلار پاناسىز قاڭعىباستاردىڭ مەكەنىنە اينالعالى تالاي ۋاقىت بولدى دەسەدى.

قالا كوركىن بۇزعان يەسىز گاراجداردى ءسۇرۋ جۇمىستارى بۇكىل قالا اۋماعىندا جۇرگىزىلمەك. ءبىر عانا اۋەزوۆ اۋدانىندا  200-دەن استام ەسكىرگەن تەمىر قويما بولسا، ەكولوگتار ەكى اپتا ىشىندە ولاردىڭ 14ء-ىن بۇزعان. قالعانى جىل سوڭىنا دەيىن جويىلادى.