الماتىدا الەمنىڭ 5 مىڭنان استام تۋريستىك فيرماسىنىڭ قاتىسۋىمەن كورمە-فورۋم ءوتتى.

الماتىدا الەمنىڭ 5 مىڭنان استام تۋريستىك فيرمالارىنىڭ قاتىسۋىمەن كورمە-فورۋم وتكىزدى. تۋريزممەن-اق حالقىن اسىراپ، جىلىنا ميللياردتاعان دوللار تاباتىن مەملەكەتتەر قازاقستانعا تاجىريبەلەرىمەن ءبولىستى.

قۇم دالادان اق سافاري ساياحاتىن ساپالى وتكىزىپ، قىزىل تەڭىزدىڭ قىزىعى ارقىلى قاپ-قاپ قارجى تاۋىپ وتىرعان ەلدىڭ ءبىرى - ەگيپەت. تورتكۇل دۇنيەدەن اعىلعان ادامدار سانىنىڭ ارتۋى ءۇشىن ءتيىمدى تاسىلدەر قولداناتىن مىسىرلىقتار بىلتىر تۋريستەر سانىن 8 ميلليونعا جەتكىزىپتى.

«مىسىر ەمدىك، دەمالۋ جانە تاريحي جەرلەردى ارالاۋ سىندى سان ءتۇرلى باعىتتاردا ءتۋريزمدى جوعارى جولعا قويعان. ءبىراق وسىنداي كورمە ارقىلى ءبىز ەلدى تانىستىرۋدى ءالى دە جالعاستىرا بەرمەكپىز. الماتىدا ءوتىپ جاتقان كورمەگە مىڭداعان كومپانيالاردىڭ وكىلدەرى كەلدى. ولار وسى ارقىلى-اق سىزدەردىڭ تۋريستىك فيرمالارمەن بايلانىس ورناتىپ، ەلدەرىڭىزدى ناسيحاتتاي الادى. ءبىز سىزدەردەگى  قىزمەت ساپاسىن جوعارلاتۋ جولى بويىنشا ستۋدەنتتەردى وزىمىزگە اپارىپ، تاجىريبەمەن بولىسۋگە  دايىنبىز»، - دەدى مىسىر اراب رەسپۋبليكاسى ەلشىلىگىنىڭ اتتاشەسى نەمدان يبراھيم.

بىلتىر انتاليا، الانيا، ستامبۋل سىندى بەس قالاسى ارقىلى 32 ميلليون تۋريست تارتقان تۇركيا بيلىگى دە الماتىدا ءوتىپ جاتقان كورمەگە قاتىسىپ جاتىر. قىزمەت پەن قۇندى قاتار الىپ، الەم حالقىن قىزىقتىرا بىلگەن تۇرىكتەر قازاقستاننىڭ تۋريست الەۋەتى ارتىق دەيدى.  

«تۇركيا كوپتەگەن سالا بويىنشا قازاقستانمەن دوستىق قاتىناستا. قازاقستان گەوگرافيالىق مۇمكىندىكتەرى، كورىكتى جەرلەرى، تابيعاتى ارقىلى ءتۋريزمى جوعارى ەلدەردىڭ قاتارىنان كورىنۋگە مۇمكىندىگى بار. بىلتىر قازاقستاننان 400 مىڭ دەمالۋشى تۇركياعا بارسا، بيىل ونى 600 مىڭعا دەيىن جەتكىزۋدى جوسپارلاپ وتىرمىز. وتكەن جىلى ەلىمىز تۋريزم ارقىلى 30 ميلليارد دوللاردان ارتىق كىرىس كىرگىزدى»، - دەدى  تۇركيانىڭ قازاقستانداعى باس كونسۋلى رىزا كاگان يىلماز.

كورمەگە كەلۋشىلەردىڭ ىشىندە جەرگىلىكتى تۋريستىك فيرمالارمەن كەلىسىم شارتقا وتىرىپ جاتقان كومپانيالار كوپ. تەك،  الماتىنىڭ شىمباۇلاق، مەدەۋ، كوك توبە سىندى كورىكتى جەرلەرىنەن بولەك ەلدىڭ ءار وڭىرىندە جۇزدەگەن ورىندار بار. تەك، سىرتقى جارناما مەن قىزمەت ساپاسى اقساپ تۇر.

«ءبىزدىڭ تۋريستەر قايدا بارعىسى كەلەدى؟ كورمە زەرتتەۋ مەن قىزمەت تۇرلەرىن انىقتاۋعا مۇمكىندىك بەرەدى.  شەتەلدىك كومپانيالارمەن بايلانىس ارقىلى ءبىز باسقا مەملەكەتتىڭ ادامدارىنا ءوز  قىزمەتىمىزدى ۇسىنامىز. بىزدەگى قوناق ءۇي قۇنى، قىزمەت اقىسى سىرتى تۋريستەر اعىنى كوبەيگەن كەزدە تومەندەپ، ساپا جوعارلايدى»، - دەدى قازاقستان تۋريزم قاۋىمداستىعىنىڭ پرەزيدەنتى  روزا ازانبايەۆا

«تۋريزم جانە ساياحات» كورمەسىنە 29 ەلدەن 5 مىڭنان استام فيرما قاتىسىپ جاتىر. قازاقستان تۋريزم قاۋىمداستىعىنا 700-دەن استام كومپانيا مۇشە بولعانمەن، كوبى جانباعىس ءۇشىن جەرگىلىكتى جۇرتتى شەتكە جىبەرۋگە جۇمىس جاسايدى. سايكەسىنشە  سىرتتان كەلەتىن تۋريستەردىڭ ورتاشا كورسەتكىشى 2 ميلليون ادامنان اسپايدى.  ال جەر كولەمى شاعىن بولسادا جىلىنا 6 ميلليون ساياحاتشىنى تارتىپ وتىرعان گرۋزيا،  ادام اعىنىن ارتتىرۋ ءۇشىن ۇشاق قۇنىندا قۇلدىراتۋعا بارىپ وتىرمىز دەيدى. 3 كۇنگە سوزىلاتىن كورمە-فورۋم بارىسىندا وتاندىق فيرمالار ۇشاق، قوناق ءۇي، سىندى ساياحات سالاسىنا قاتىستى پروبلەمالاردى تالقىلاماق.