انكارادا اتاقتى كۇيشى، كومپوزيتور دينا نۇرپەيىسوۆانىڭ مۇسىندىك كومپوزيسياسى اشىلادى. بۇل تۋرالى ورتالىق كوممۋنيكاسيالار قىزمەتىندەگى بريفينگ بارىسىندا اتىراۋ وبلىسىنىڭ اكىمى نۇرلان نوعايەۆ ءمالىم ەتتى.

جوباعا اتىراۋ وبلىسىنىڭ بيزنەس قۇرىلىمدارىنىڭ وكىلدەرى قولداۋ ءبىلدىردى. قازاق كومپوزيتورىنىڭ ەسكەرتكىشىن ورناتۋعا 15 ملن تەڭگە جۇمسالماق.

مۇسىندىك كومپوزيسيا قازاقستان رەسپۋبليكاسى تاۋەلسىزدىگىنىڭ 20 جىلدىعىن تۇركيادا مەرەكەلەۋ اياسىندا 2011 جىلى انكارادا اشىلعان دينا نۇرپەيىسوۆا اتىنداعى ساياباقتا ورناتىلادى. سول جىلى تۇركيادا اتاقتى قازاق كومپوزيتورى دينا نۇرپەيىسوۆانىڭ 150 جىلدىق مەرەيتويى كەڭىنەن اتالىپ ءوتتى.

- قازاقستاننىڭ مەملەكەت باسشىسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا رۋحاني جانە مادەني قۇندىلىقتاردى ساقتاۋعا جانە مولايتۋعا ەرەكشە كوڭىل بولىنگەنىن اتاپ وتكىم كەلەدى. جاھانداعى زاماناۋي قازاقستاندىق مادەنيەت» جوباسى اياسىندا قازىرگى تاڭدا قازاق مادەنيەتىنىڭ ۇزدىك تۋىندىلارىمەن الەم جۇرتشىلىعىن تانىستىرۋ ءۇشىن جاعدايلار جاسالۋدا. بۇل وتاندىق شىعارماشىلىق زيالى قاۋىم ءۇشىن ۇلكەن مۇمكىندىكتەرگە جول اشادى، - دەدى نۇرلان نوعايەۆ. 

 قازاقستان ەلشىلىگىنىڭ، تۇركيانىڭ مادەنيەت جانە تۋريزم مينيسترلىگىنىڭ، تۇرىك مادەنيەتى حالىقارالىق ۇيىمىنىڭ (تيۋركسوي) جانە انكارا قالاسى ەتيمەسگۋت اۋدانى مەرىنىڭ ۇيىمداستىرۋىمەن 2011 جىلى دينا نۇرپەيىسوۆا اتىنداعى ساياباق اشىلعانىن ەستەرىڭىزگە سالامىز. بۇل – تانىمال كۇيشىنىڭ اتىنداعى شەتەلدە اشىلعان العاشقى ساياباق. 

اتاقتى قازاق كومپوزيتورى دينا نۇرپەيىسوۆا – تەك قازاق حالقىنىڭ ەمەس، بۇكىل تۇرىك جۇرتشىلىعىنىڭ ىقىلاسى مەن قۇرمەتىنە بولەنگەن تۇرىك الەمىندەگى العاشقى ايەل.