الماتى قالاسىندا كاسىپكەرلەرىنىڭ ءداستۇرلى كونفەرەنسياسى ءوتتى.

كاسىپكەرلىك كوكجيەگىن كەڭەيتۋ. بيزنەستەگى بوگەتتەر. ىسكەرلەر اراسىندا تۋىنداعان ماسەلەلەر الماتى قالاسى كاسىپكەرلەرىنىڭ ءداستۇرلى كونفەرەنسياسىندا ءسوز بولدى. جيىنعا قالا اكىمى بايىرجان بايبەك پەن «اتامەكەن» ۇلتتىق كاسىپكەرلەر پالاتاسىنىڭ ءتوراعاسى تيمۋر قۇلىبايەۆ قاتىستى. باسقوسۋدا ورتا جانە شاعىن بيزنەستى دامىتۋ جونىندە اتقامىنەرلەر مەن بيزنەس وكىلدەرى ءوز پىكىرلەر مەن ۇسىنىستارىن ايتتى.

الماتى قالاسى بيزنەس ءۇشىن ءتيىمدى ايماق. ماسەلەن، شاعىن ورتا بيزنەس شىعاراتىن تاۋاردىڭ 26 پايىزى وسى الىپ شاھاردا وندىرىلسە، قالاداعى ونىڭ ۇلەسى 33،7 پايىزدى قۇرايدى. ال سالىق تۇسىمدەرىنىڭ 50 پايىزى دا سولاردىڭ ەسەبىندە. سونىڭ ارقاسىندا، ايماقتىق جالپى ىشكى ءونىم مولشەرى 11،7 پايىزعا ارتقان. شاعىن ورتا بيزنەستە زاڭدى تۇردە قالاداعى ءاربىر 7ء-شى ادام جۇمىس ىستەيدى. وسى رەتتە الماتى قالاسىنىڭ اكىمى باۋىرجان بايبەك جەرگىلىكتى كاسىپكەرلەردى قولداپ، بيزنەس وكىلدەرىنە بارىنشا كومەك بەرىپ جاتقان «اتامەكەن» ۇلتتىق پالاتاسىنا ءوز العىسىن ءبىلدىردى.

«شىن مانىندە، وسى جىلدىق كاسىپكەرلەردىڭ كونفەرەنسياسى اشىق پروبلەمالاردى تالقىلايتىن جاقسى الاڭعا اينالدى. ارينە، جۇمىس بولعاندىقتان كەمشىلىكتەرسىز دە بولمايدى. ەندى ۇلكەن قالا. الماتى - كاسىپكەرلەردىڭ التىن بەسىگى دەپ جاقسى ايتىپ كەتتىڭىز. ءبىز وسى جاۋاپكەرشىلىكتى سەزەمىز. سوندىقتان ءاربىر كاسىپكەردىڭ، الماتىلىقتاردىڭ، ءبىزدىڭ سالىق تولەۋشىلەردىڭ پروبلەمالارىن شەشۋگە تىرىسامىز. ەندى بىزدە قولىمىزدان كەلگەنشە ماسەلەلەردى جۇيەلى شەشۋگە تالپىنامىز.  ول دا مىنا كاسىپكەرلىك پالاتاسىنىڭ قولداۋىمەن جولعا قويىلعان»، - دەدى الماتى قالاسىنىڭ اكىمى باۋىرجان بايبەك.

ءوز كەزەگىندە، تيمۋر قۇلىبايەۆ «اتامەكەننىڭ» اتقارعان جۇمىستارىنا توقتالدى. 2013 پەن 2017 جىلدار ارالىعىندا ۇلتتىق پالاتاعا بيزنەستى قورعاۋعا قاتىستى 22 مىڭنان استام ءوتىنىم كەلىپ ءتۇسىپتى. ولاردىڭ 40 پايىزى وڭ شەشىم تاۋىپ، ناتيجەسىندە 92 ملرد تەڭگەدەن استام سومادا كاسىپكەرلەردىڭ مۇلىكتىك قۇقىعى قورعالعان. وتىنىمدەردىڭ باسىم بولىگى ساۋلەت، قالا قۇرىلىسى، سالىق ورگاندارىنا قاتىستى.  «اتامەكەن» 20 مىڭنان استام ءنورماتيۆتى-قۇقىتىق اكتىلەر مەن زاڭ جوبالارىنا ساراپتاما جۇرگىزىپتى. مەملەكەتتىك ورگاندار ۇسىنىستاردىڭ 73 پايىزىن ەسكەرىپ،  ۇلتتىق پالاتا جاڭا سالىق كودەكسىنىڭ دايىندالۋىنا بەلسەنە قاتىسقان.

«الماتى - كاسىپكەرلەردىڭ باسىن قوسقان الىپ شاھار. ونداعى بيزنەس كليماتتىڭ ءبىزدىڭ ەلىمىزگە دە اسەرى بار. سوندىقتان بۇل سالاعا اسا كوڭىل ءبولىپ، اكىمشىلىك كەدەرگىلەردى جويۋ كەرەكتىگىن قاراستىرۋدامىز. جالپى مەملەكەتتىك ورگاندار مەن كاسىپكەرلەر اراسىندا جاقسى قارىم-قاتىناس ورنادى دەپ ايتۋعا بولادى. ەندى ونى ارى قاراي دامىتۋ كەرەك. وزدەرىڭىز بىلەسىزدەر، باس پروكۋراتۋرا جانىنان كاسىپكەرلەردى قورعايتىن كەڭەس اشىلدى. ول دا بولسا، بيزنەس وكىلدەرىن بارىنشا قولداۋعا باعىتتالدى»، - دەدى «اتامەكەن» ق ر ۇلتتىق كاسىپكەرلەر پالاتاسىنىڭ ءتورالقا ءتوراعاسى تيمۋر قۇلىبايەۆ.

ءداستۇرلى جيىن سوڭىندا كاسىپكەرلەر ويدا جۇرگەن پىكىرلەرى مەن ۇسىنىستارىن ايتتى. بەلگىلى بولعانداي، ءقازىر يمپورتتى الماستىرۋعا جاتاتىن 268 وتاندىق تاۋار ءتۇرى انىقتالدى. بۇگىندە 7،9 ترلن تەڭگەگە تاۋار يمپورتتالسا، ونىڭ 1،6 ترلن تەڭگە سوماسىنداعى وتاندىق تاۋار يمپورتتى الماستىرۋعا قاۋقارلى. ەلدە جارىقتاندىرۋ، سىر-بوياۋ ونىمدەرى مەن قۇرىلىسقا قاجەتتى مەتالل قۇرىلىمى بار.