بۇگىن بالۋان شولاق اتىنداعى سپورت سارايىندا حوككەيدەن ايەلدەر اراسىنداعى قازاقستان بىرىنشىلىگىنىڭ ءۇشىنشى تۋرىنىڭ العاشقى كەزدەسۋلەرى ءوتتى.

ءبىرىنشى بولىپ جارىس جولىنا «توميريس» پەن «گورنياك» شىقتى. بۇل كەزدەسۋدە استانالىق قىزدار رۋدنىي حوككەيشىلەرىن 19:0 ەسەبىمەن ويسىراتا ۇتتى.

سونىمەن قاتار، ەكىنشى ويىندا «ايسۇلۋ U-18» مەن «تورپەدو كوماندالارى اراسىندا ءوتتى. العاشقى ەكى كەزەڭ بىردەي ۇپاي ساندارىمەن اياقتالدى. بىرىنشىسىندە 1:1، ال ەكىنشىسىندە سايكەسىنشە 2:2. ءبىراق، ءۇشىنشى كەزەڭدە وسكەمەندىك "تورپەدو" الاڭ قوجايىندارىنىڭ قاقپاسىنا ەكى شايبا سالىپ، 4:3 ەسەبىمەن جەڭىسكە جەتتى.

- شەشۋشى ءۇشىنشى تۋردا 5 كوماندا جارىس جولىنا شىعادى. ولار اينالىما جۇيەسى بويىنشا ءوزارا مىقتىنى انىقتايدى. وسى تۋردا «ايسۇلۋ U-18» العا ۇمتىلۋ ءۇشىن جاقسى ناتيجەلەر كورسەتۋى قاجەت. ءبىراق، ولار تەك ءتورتىنشى ورىندى عانا يەلەنە الادى. جۇلدەلى ورىنداردى ساراپقا سالۋ ءۇشىن ءالى دە ءبىراز جۇمىس ىستەۋ قاجەت. ال «ايسۇلۋ» تۇراقتى تۇردە ءبىرىنشى ورىندا، وعان قوسا، ولاردىڭ باستى قارسىلاستارى استانالىق حوككەيشى قىزدار قاتەلىكتەر جىبەرىپ، ۇپايلارىن جوعالتقان بولاتىن. وسى جىلى دا «ايسۇلۋ» قازاقستان چەمپيونى اتانادى دەپ ويلايمىن، - دەپ قورىتىندىلادى جارىستىڭ باس تورەشىسى سەرگەي پەترەچەنكو.

ەسكە سالا كەتسەك، الماتىلىق «ايسۇلۋ» مەن «ايسۇلۋ-18» كوماندالارى قوناقتاردى كۇندەلىكتى ساعات 10:00-دە جانە 12:40-تا قابىلدايتىن بولادى. ويىندار سپورت سارايىنىڭ كىشى زالىندا وتەدى. ايتا كەتەر جايت، ەل چەمپيوناتىندا الماتىلىق «ايسۇلۋ» ءبىرىنشى ورىنمەن كوش باستاپ تۇر.

21 ءساۋىر

10:00. «ايسۇلۋ» - «ايسۇلۋ-18»

12:40. «تورپەدو» - «گورنياك»

22 ءساۋىر

10:00. «ايسۇلۋ» - «توميريس»

12:40. «ايسۇلۋ-18» - «گورنياك»

23 ءساۋىر

10:00. «ايسۇلۋ» - «تورپەدو»

12:40. «ايسۇلۋ-18» - «توميريس»

24 ءساۋىر

10:00. «توميريس» - «تورپەدو»

12:40. «ايسۇلۋ» - «گورنياك»