ەلباسى جولداۋدا سيفرلىق ءبىلىم بەرۋ رەسۋرستارىن دامىتۋ، كەڭ جولاقتى ينتەرنەتكە قوسۋ جانە مەكتەپتەردى ۆيدەوقۇرىلعىلارمەن جابدىقتاۋ جۇمىستارىن جالعاستىرۋدىڭ ماڭىزدىلىعىن نىقتاپ ايتقان ەدى. سيفرلىق ءبىلىم بەرۋ جۇيەسىن دامىتۋ ماقساتىندا بقو-دا ءبىرقاتار شارالار قولعا الىنۋدا. ايتا كەتسەك، باتىس قازاقستان وبلىسىندا بيىل 220 شاعىن جيناقتى مەكتەپكە «ءبىلىم book» ەلەكتروندى جۇيەسى جەتكىزىلمەك. بۇل تۋرالى «سيفرلاندىرۋ: بارشاعا قولجەتىمدى ساپالى ءبىلىم» تاقىرىبىمەن وتكەن «ءباتىسبىلىمتاlks» لەكتوريي جوباسىنىڭ ءى سەسسياسىندا باتىس قازاقستان وبلىسىنىڭ اكىمى التاي كولگىنوۆ ايتتى.
ءوڭىر باسشىسىنىڭ ايتۋىنشا، وبلىستاعى 444 ەلدى مەكەننىڭ 152ء-سى ينتەرنەتكە قوسىلماعان. وعان قوسا مەكتەپتەر، مەدپۋنكتتەر مەن باسقا الەۋمەتتىك نىساندار بار. سونىڭ ءبارىن ينتەرنەتكە قوسۋ جوسپارعا ەنگىزىلگەن. وسى ورايدا «قازاقتەلەكوم» اق باسقارما ءتوراعاسى قۋانىشبەك ەسەكەيەۆپەن جول كارتاسىنا قول قويىلدى. بۇل رەتتە دەنساۋلىق ساقتاۋ، ءبىلىم بەرۋ مەكەمەلەرىن سيفرلاندىرۋعا بارىنشا ءمان بەرىلەدى. اسىرەسە، شالعاي اۋىلدارداعى شاعىن مەكتەپتەر ايرىقشا نازار اۋدارۋدى قاجەت ەتەدى. قازىرگىدەي جاپپاي دامۋ كەزەڭىندە ول ءبىلىم وشاقتارى قالا مەكتەپتەرىنەن كەم بولماۋى كەرەك. سوندىقتان 220 شاعىن مەكتەپكە «ءبىلىم book» ەلەكتروندى جۇيەسىن ەنگىزۋگە قارجى ءبولىنىپ، مەملەكەتتىك ساتىپ الۋ جۇمىستارى جۇرگىزىلۋدە. 1 قىركۇيەكتە ول مەكتەپتەر جاڭا كومپيۋتەرلەرمەن، باعدارلاماسىمەن قامتىلادى.
-«ءبىلىم book» جوباسى شاعىن مەكتەپتەرگە ىڭعايلى. وندا كومپيۋتەر جادىنا قاجەتتى ءبىلىم رەسۋرسى سالىنعان. ينتەرنەتتىڭ قاجەتى جوق. ءبىر سىنىپتا 15 بالادان ءبىلىم الاتىن بولسا، ءمۇعالىم ولاردىڭ ءارقايسىسىنا ءار ءتۇرلى ەلەكتروندىق تاپسىرما بەرە الادى. بالا ساباقتى يگەرمەيىنشە، باعدارلامامەن العا جىلجي المايدى. مۇنى ءبىز ەلىمىزدىڭ ءۇش شاعىن مەكتەبىندە تاجىريبەدەن وتكىزىپ كوردىك. ناتيجەسى ويداعىداي. بيىل باتىس قازاقستانداعى شاعىن مەكتەپتەردە وسى جۇمىس قولعا الىنادى. باستى ماقسات - الىس اۋىلدارداعى مەكتەپتەردە ءبىلىم ساپاسىن كوتەرۋ، - دەدى ر.كەنجەحان ۇلى.
اۋدان ورتالىقتارىنداعى مەكتەپتەردە شاكىرتتەر ەلەكتروندى باعدارلامالاردى، جاڭا تەحنولوگيالاردى تولىق قولداناتىن بولادى. التاي كولگىنوۆتىڭ سوزىنە قاراعاندا، ق ر اقپارات جانە كوممۋنيكاسيالار مينيسترلىگىمەن بىرىگىپ جاسالعان جوسپارعا سايكەس تاياۋداعى ءۇش جىلدا ينتەرنەت ماسەلەسىن شەشۋ كوزدەلۋدە. اتاپ ايتقاندا، 100 ەلدى مەكەن كەڭ جولاقتى ينتەرنەتكە قوسىلىپ، سيفرلاندىرۋ جۇمىستارىنا جول اشىلادى. بۇل وقۋشىلار مەن مۇعالىمدەردىڭ سيفرلىق جۇيەدە ءبىلىم الىپ، جۇمىس جاساۋىنا مۇمكىندىك بەرەدى. سونداي-اق، «ءقاۋىپسىز اۋلا» جوباسى اياسىندا «قازاقتەلەكوم» اق-مەن بىرگە ورالدا 2 مىڭ بەينەكامەرا ورناتىلادى. بۇل 200 كوپ قاباتتى ءۇيدى نەمەسە 1 مىڭ كىرەبەرىستى قامتيدى.
جيىندا «قازاقتەلەكوم» اق باسقارما ءتوراعاسى قۋانىشبەك ەسەكەيەۆ الداعى ەكى جىلدا باتىس قازاقستان وبلىسىنىڭ بەس اۋدان ورتالىعىن وپتيكالىق-تالشىقتى بايلانىس جەلىسىنە قوسۋ جوسپارلانىپ وتىرعانىن جەتكىزدى. «BilimmediaGroup» جشس-نىڭ ديرەكتورى راۋان كەنجەحان ۇلى، «Knowledge Egineering» جشس-نىڭ ديرەكتورى نارتاي ءاشىم «ءبىلىم بەرۋدەگى زاماناۋي ترەندتەر» جانە «مۇعالىمدەردىڭ كاسىبي بىلىكتىلىگىن ارتتىرۋعا ارنالعان ساندىق رەسۋرستار» تاقىرىپتارىندا ءوز وي-تاجىريبەلەرىمەن ءبولىستى.
