تاراز قالاسى اكىمدىگىنىڭ اۋىل شارۋاشىلىعى ءبولىمى جانە «رەسپۋبليكالىق فيتوسانيتارلىق دياگنوستيكا جانە ادىستەمەلىك بولجامداۋ ورتالىعىنىڭ» وبلىستىق فيليالىنىڭ ماماندارى قالاداعى تال-داراقتارعا تەكسەرۋ جۇمىستارىن جۇرگىزىپ، ناتيجەسىندە، تال-داراقتاردا بىرنەشە زيانكەستەر ءتۇرىنىڭ قونىستانۋى انىقتالدى. اتاپ ايتقاندا، قاراعاش جاپىراق جەمىرى قوڭىزدارى، قاراعاش اياققۇيرىق كوبەلەگىنىڭ قۋىرشاقتارى، سىمقۇرت، جالعان سىمقۇرتتار جانە تەرەك جاپىراق جەگىشى قوڭىزدارى. بۇگىنگى كۇنگە قالا اۋماعى بويىنشا جالپى 60 گا جەرگە حيميالىق وڭدەۋ جۇمىستارى جۇرگىزىلۋ قاجەتتىگى انىقتالىپ وتىر. ءبىرىنشى كەزەكتە قالاداعى ورتالىق كوشەلەرمەن پارك سكۆەرلەر قامتىلادى. بۇل جۇمىستارعا قالا بيۋدجەتىنەن 6،0 ملن. تەڭگە قاراستىرىلعان. ەلەكتروندى كونكۋرس ويناتىلىپ، قالاداعى تال-داراقتارىنا حيميالىق وڭدەۋ جۇمىستارى جۇرگىزىلەدى.

 وڭدەۋ جۇمىستارى ەكى كەزەڭنەن تۇرادى. ءبىرىنشى كەزەڭى – قاراعاش جاپىراق جەمىرى زيانكەسىنىڭ بالاڭقۇرتتارى تۋىلىپ شىعۋى كەزىندە، ياعني، مامىر ايىندا جۇرگىزىلسە، وڭدەۋ جۇمىستارىنىڭ ەكىنشى كەزەڭى – بالاڭقۇرتتاردىڭ 2ء-شى ۇرپاعىنىڭ شىعۋىنا بايلانىستى شىلدە ايىنىڭ 1ء-شى ونكۇندىگىندە. قازىرگى ۋاقىتتا قالا تۇرعىندارىن الاڭداتىپ وتىرعان قاراعاش جاپىراق جەمىرى زيانكەسىنە كەلەر بولساق، قىستاپ شىققان قوڭىزى تال-داراقتارىنىڭ جاپىراقتارىنا اسا زيان كەلتىرمەيدى، شاعىلىسىپ، جۇمىرتقالاپ، سول جۇمىرتقادان شىققان بالاڭقۇرتتارى جاپىراققا زيان كەلتىرەتىن زيانكەس رەتىندە بەلگىلى. سوندىقتان، بالاڭقۇرتتاردىڭ تۋىلۋىنا بايلانىستى حيميالىق وڭدەۋ جۇمىستارى جۇرگىزىلەدى.

قاراعاش جاپىراق جەمىرى زيانكەسىنە قارسى حيميالىق وڭدەۋ جۇمىستارى قازاقستان رەسپۋبليكاسىندا رۇقسات ەتىلگەن تيىمدىلىگى وتە جوعارى (85-92 پايىز) كاراتە-050 پرەپاراتىمەن وپۆ- 12وو بۇرىككىش (دارىلەگىش) تەحنيكا ارقىلى جۇرگىزىلەدى.

حيميالىق وڭدەۋ جۇمىستارى تاڭعى ساعات 3.30-7.00 ارالىعىندا، ياعني كوشەدە جاياۋ جۇرگىنشىلەردىڭ جانە اۆتوكولىكتەردىڭ از ءجۇرۋى كەزىندە ىسكە اسىرىلادى.

تاراز قالاسى اكىمدىگىنىڭ اۋىلشارۋاشىلىعى ءبولىمىنىڭ باسشىسى ا.تلەۋبايەۆ