ۇلىبريتانيا پارلامەنتىنىڭ وكىلدەر پالاتاسى ادام قۇقىعىن بۇزدى دەپ تانىلعان ازاماتتارعا قارسى سانكسيا سالۋدى ماقۇلدادى. سانكيا سالۋ تۋرالى جوبا داۋىسقا سالىنباي-اق قابىلدانعان.

 ۇلىبريتانيا سىرتقى ىستەر ءمينيسترى بوريس دجونسون مۇنى «ماڭىزدى وقيعا» دەپ اتادى.

«بۇل جاعداي ۇلىبريتانيانىڭ الەمدە ادام قۇقىعىن بۇزۋشىلارعا قارسى شارالار قولدانۋىنا مۇمكىندىك تۋدىرادى. ۇلىبريتانيا الەمدە ادام قۇقىعىن قورعايدى» دەپ جازدى دجونسون Twitter-دەگى پاراقشاسىندا. زاڭ جوباسى كۇشىنە ەنۋى ءۇشىن ونى ەندى لوردتار پالاتاسى ماقۇلداۋى ءتيىس.

ازاتتىق بەرگەن مالىمەتكە سۇيەنسەك، ۇلىبريتانيادا مۇنداي زاڭ جوباسى ناۋرىز ايىندا سولسبەري قالاسىندا رەسەي سىرتقى بارلاۋ قىزمەتىنىڭ بۇرىنعى اگەنتى سەرگەي سكريپال مەن قىزى يۋليا سكريپال ۋلانعان سوڭ ماقۇلدانىپ وتىر. بريتان تەرگەۋشىلەرى سكريپالدەردى ۋلاۋعا رەسەي ارنايى قىزمەتىنىڭ قاتىسى بار دەپ بىلەدى.

زاڭ جوباسى ۇلىبريتانياداعى سانكسيا سالۋ تۋرالى زاڭعا تۇزەتۋ رەتىندە ۇسىنىلعان جانە ول قابىلدانسا، ۇكىمەت الەمدە ادام قۇقىعىن بۇزدى دەپ تانىلعاندارعا قارسى سانكسيا سالۋعا قۇزىرەتتى بولادى.

مۇنداي زاڭ بۇعان دەيىن اقش-تا قابىلدانعان. كەڭەيتىلگەن زاڭدا ۆاشينگتون «ادام قۇقىعىن بۇزۋعا قاتىسى بار» دەپ بىلەتىن رەسەيلىكتەرگە ەكونوميكالىق سانكسيالار سالۋ جانە ۆيزالار بەرمەۋ شارالارىن قاراستىرعان.