ورتالىق كوممۋنيكاسيالار قىزمەتىندە 2018 جىلعى ءبىرىڭعاي ۇلتتىق تەستىلەۋگە دايىندىعىنا ارنالعان باسپا ءسوز ماسليحاتى ءوتتى.

«تەست سۇراقتارىنىڭ 50 پايىزى جاڭارتىلدى. بىلتىر 40 مىڭ سۇراق بولسا، بيىل 119 مىڭ سۇراق بار. ونىڭ ىشىندە 3 مىڭداي سۇراق اعىلشىن تىلىندە. سوندىقتان، وسى 119 مىڭ سۇراقتىڭ ىشىندە 11 پايىزى فۋنكسيونالدىق ساۋاتتىلىق بويىنشا، ال 37 پايىزى ءبىر نەمەسە بىرنەشە دۇرىس جاۋاپتارعا قۇرىلعان سۇراقتار. بۇگىنگى تاڭدا 69 963 تۇلەك ۇلتتىق ءبىرىڭعاي تەستىلەۋگە ءوتىنىش بەرگەن، سونىڭ ىشىندە 73 مىڭى قازاق تىلىندە تاپسىرامىن دەگەن ءوتىنىش. بۇل 80 پايىزعا جۋىق كورسەتكىش. ال جالپى بيىل مەكتەپ بىتىرەتىن تۇلەكتەردىڭ سانى 146 مىڭ، ونىڭ 69 پايىزى تەستىلەۋگە قاتىسۋىعا ءوتىنىش بەردى»، - دەپ مالىمدەدى ق ر بعم «ۇلتتىق تەستىلەۋ ورتالىعىنىڭ» ديرەكتورى رامازان ءالىمقۇلوۆ.

اعىمداعى جىلى ۇبت تەستىلەۋ وتكىزۋدىڭ 167 ورتالىعىندا وتەتىن بولادى. ال ءار پاننەن شەكتەۋلى بالل – 60. اۋىلشارۋاشىلىعى مەن ۆەتەرەناريا بويىنشا شەكتى بالل - 60، ۇلتتىق ۋنيۆەرسيتەتتەر مەن مەديسينا ماماندىقتارىنا شەكتى بالل – 65.

ەسكە سالا كەتسەك، ۇلتتىق ءبىرىڭعاي تەستىلەۋگە قاتىسۋ ءۇشىن وتىنىشتەردى قابىلداۋ اعىمداعى جىلدىڭ 10 مامىرىنا دەيىن جالعاسادى. ال تەستىلەۋ اعىمداعى جىلدىڭ 20 ماۋسىمىنان 1 شىلدەسى ارالىعىندا وتەدى. ۇبت 5 ءپان بويىنشا جۇرگىزىلەدى، 3 مىندەتتى جانە تاڭدالعان ماماندىعىنا سايكەس 2 ءپروفيلدى ءپان.

مۇرات راحيمجانوۆ