ارمەنيا پرەزيدەنتى ارمەن ساركيسيان تمد مەملەكەتتەرىنىڭ ەلشىلەرىمەن ەلدەگى جاعدايدى تالقىلادى. بۇل تۋرالى ارمەنيا پرەزيدەنتىنىڭ باسپا ءسوز قىزمەتى حابارلادى.
«پرەزيدەنت ارمەن ساركيسيان بەلارۋس، قازاقستان، تۇركمەنستان رەسپۋبليكالارىنىڭ توتەنشە جانە وكىلەتتى ەلشىلەرىن قابىلدادى. كەزدەسۋ بارىسىندا كۇن تارتىبىندەگى ماڭىزدى وقيعالار مەن ەكى جاقتى سەرىكتەستىك ماسەلەلەرى تالقىلاندى»، - دەلىنگەن باسپا ءسوز حابارلاماسىندا.
ريا نوۆوستي ارمەنياداعى شەرۋلەردىڭ باسىندا تۇرعان وپپوزيسيا باسشىسى نيكول پاشينياننىڭ رەسەي، ەو، يران جانە گرۋزيا ەلشىلەرىمەن كەزدەسۋگە نيەتتى ەكەنىن حابارلاعان.
«ءبىز رەسەي، ەو، يران، گرۋزيا، سونىمەن قاتار ديپلوماتيالىق كورپۋس وكىلدەرىمەن كەزدەسۋدى جوسپارلاپ وتىرمىز. ولارمەن ەلدەگى ساياسي احۋالدى تالقىلايمىز»، - دەپ كەلتىردى پاشينياننىڭ ءسوزىن Sputnik ارمەنيا پورتالى.
ەسكە سالا كەتەيىك، ارمەنيادا وپپوزيسيا ليدەرى نيكول پاشينيان ۇكىمەت باسشىسى بولىپ سايلانا المادى. پرەمەر-مينيسترلىككە جالعىز ۇمىتكەر بولعان وپپوزيسيا ليدەرىنە ارمەنيا رەسپۋبليكالىق پارتياسىنىڭ دەپۋتاتتارى قارسى داۋىس بەرگەندىكتەن ءتيىستى داۋىستى جيناي المادى.
13 ساۋىردە ارمەنياداعى جاپپاي شەرۋ اكسياسىن باسقارعان پاشينيان – پرەمەرلىككە جالعىز ۇمىتكەر. ونى وپپوزيسيالىق «ەلك» فراكسياسى ۇسىندى. دەمونسترانتتار 23 ساۋىردە ەلدىڭ بۇرىنعى پرەمەر-مينيسترى سەرج سارگسياندى لاۋازىمىنان بوساتىپ، ونىڭ ورنىنا پاشينياندى ۇكىمەت باسى ەتۋدى تالاپ ەتكەن.
«ەلك»ء-تىڭ ۇمىتكەرىن «سارۋكيان» جانە «داشناكسۋتيۋن» اتتى ەكى فراكسيا دا قولدادى. بۇل ءۇش فراكسيانىڭ دەپۋتاتتارىمەن قوسا ارمەنيا رەسپۋبليكالىق پارتياسىنىڭ تاعى 6 دەپۋتاتى پاشينيانعا داۋىس بەرۋى كەرەك ەدى. پارتيا باسشىسى ۆاگرام باگداساريان بۇعان دەيىن «ءۇش فراكسيا پاشينياندى قولداسا، رەسپۋبليكالىق پارتيا بوگەت كەلتىرمەيدى» دەپ مالىمدەگەن.
