بيىل حالىق قاھارمانى قاسىم قايسەنوۆتىڭ تۋعانىنا – 100 جىل. وسىعان وراي شىعىس قازاقستان وبلىستىق مۇراعاتتار باسقارماسى ارنايى كورمە ۇيىمداستىردى. «ەر ەسىمى ەل ەسىندە» دەگەن تاقىرىپپەن وتكەن شارادا پارتيزان-جازۋشىنىڭ ءومىر جولىن باياندايتىن فوتو-قۇجاتتار قويىلدى. مايداندا جازعان حاتتارى مەن قاسىم قايسەنوۆ تۋرالى كىتاپتار دا كوپشىلىك نازارىنا ۇسىنىلدى.
مۇراعات قىزمەتكەرلەرى كوشەلەر مەن ەلدى مەكەندەرگە باتىردىڭ ەسىمىن بەرۋ تۋرالى قابىلدانعان ءتۇرلى رەسمي قۇجاتتاردى دا مۇراعاتتار تىزىمىنە العان. كورمەدە باتىردىڭ سوعىس جىلدارى ءجۇرىپ وتكەن جولى حرونولوگيالىق سىزبامەن كورسەتىلگەن. ال بۇل قۇجاتتار مەن سۋرەتتەردىڭ كوبىن بۇرىن وبلىستىڭ مۇراعات قىزمەتىن كوپ جىلدار باسقارعان جەرگىلىكتى جازۋشى ستانيسلاۆ چەرنىح جيناپتى.
