ءساۋىر ايىندا مسق-نا 8 ملرد 17 ملن تەڭگەگە جۋىق ساقتاندىرۋ جارناسى اۋدارىلدى. بۇل تۋرالى Qamshy.kz اقپارات اگەنتتىگى "الەۋمەتتىك مەديسينالىق ساقتاندىرۋ قورى" كەاق باسپا ءسوز قىزمەتىنە سىلتەمە جاساپ حابارلايدى.

حابارلاماعا سۇيەنسەك، جۇيە ىسكە قوسىلعان 2017 جىلدىڭ 1 شىلدەسىنەن 2018 جىلدىڭ 30-ساۋىرىنە دەيىنگى ارالىقتا جۇمىس بەرۋشىلەر مەن جەكە كاسىپكەرلەر تولەگەن جارنا كولەمى 63،3 ملرد تەڭگەنى قۇراپ وتىر.

ونىڭ ىشىندە، 54،9 ملرد تەڭگە (87% جۋىعى) جۇمىس بەرۋشىلەردىڭ قاراماعىنداعى قىزمەتكەرلەرى ءۇشىن جاساعان تولەمدەرى بولسا، قالعان 8،4 ملرد تەڭگە (13% جۋىعى) – جەكە كاسىپكەرلەر مەن ازاماتتىق-قۇقىقتىق نەگىزدە ەڭبەك ەتەتىن تۇلعالارعا تيەسىلى.

ايماقتار اراسىندا جارنا تولەۋ جاعىنان الماتى جانە استانا قالالارى، سونداي-اق، قاراعاندى وبلىسى كوش باستاپ تۇر.

جيناقتالعان جارنا ۇلتتىق بانكتە ساقتالادى. ەلىمىزدىڭ باس بانكىمەن قارجىنى سەنىمگەرلىك باسقارۋ تۋرالى كەلىسىم بەكىتىلگەن. تۇسكەن قاراجات ءمامس جۇيەسى ىسكە قوسىلعاننان كەيىن ساقتاندىرۋ شەڭبەرىندە كورسەتىلەتىن قىزمەتتەر اقىسىن تولەۋگە جۇمسالادى.