«نۇر وتان» پارتياسى پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋىن ايرىقشا باقىلاۋعا الاتىن بولدى. ءتىپتى وسى ىستە ولقىلىق جىبەرگەن شەنەۋنىكتەر دەر كەزىندە انىقتالادى. بۇل تۋرالى بۇگىن بەس الەۋمەتتىك باستامانىڭ جۇزەگە اسىرىلۋىن باقىلاۋ جونىندەگى قوعامدىق كەڭەستىڭ العاشقى وتىرىسىندا ماۋلەن اشىمبايەۆ ايتتى.
«قوعامدىق كەڭەس ەلباسىنىڭ تىكەلەي تاپسىرماسى بويىنشا پارتيانىڭ مۇرىندىق بولۋىمەن قۇرىلىپ وتىر. كەڭەستىڭ جۇمىسىنا ەرەكشە ءمان بەرىلىپ وتىر. ءبىز پرەزيدەنتتىڭ بەس الەۋمەتتىك باستاماسىن جۇزەگە اسىرۋدا نەمقۇرايدىلىق تانىتقان كەز كەلگەن شەنەۋنىكتى دەر كەزىندە انىقتايمىز. قاجەت بولسا «نۇر وتان» پارتياسى ونداي شەنەۋنىكتەردى جاۋاپقا تارتۋ ماسەلەسىن دە كوتەرەتىن بولادى. ءبىز ەشكىمگە ەلباسى باستامالارىن ءسوزبۇيدالىققا سالىپ، كەشەۋلەتۋگە جول بەرمەيمىز»، – دەدى ماۋلەن اشىمبايەۆ.
«نۇر وتان» پارتياسى ءتوراعاسى ءبىرىنشى ورىنباسارىنىڭ ايتۋىنشا، قوعامدىق كەڭەس اتالعان جۇمىس بويىنشا اقپاراتتاردى ءتۇرلى دەرەك كوزدەرىنەن الىپ وتىرادى. اتاپ ايتقاندا، مەملەكەتتىك ورگاندار، قوعامدىق بىرلەستىكتەر، ۇكىمەتتىك ەمەس ۇيىمدار، ساراپشىلار جانە قاراپايىم حالىقپەن تىعىز جۇمىس ىستەۋ ارقىلى كەڭەس ەلباسى باستامالارىنىڭ ورىندالۋ بارىسىن قاتاڭ باقىلاپ وتىرماق. وسى رەتتە حالىق قاجەتتى اقپاراتتاردى قوعامدىق قابىلداۋ بولمەسى، پارتيانىڭ ۆەب-سايتىنداعى ارنايى «5bastama» ايدارى نەمەسە جەدەل جەلى ارقىلى حابارلاسىپ بەرە الاتىنىن اتاپ وتكەن ءجون.
ايتا كەتەيىك، بۇگىن استانادا پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋىن باقىلاۋ جونىندەگى قوعامدىق كەڭەس قۇرىلىپ، ونىڭ العاشقى وتىرىسى ءوتتى. كەڭەس قۇرامىنا ەلىمىزدەگى جەتەكشى ساياسي پارتيالاردىڭ باسشىلارى، ۇكىمەتتىك ەمەس ۇيىمدار مەن قازاقستان حالقى اسسامبلەياسىنىڭ وكىلدەرى، بەلگىلى قوعام قايراتكەرلەرى، بەلسەندى ازاماتتار جانە ساراپشى ماماندار مۇشە بولدى. كەڭەس ءتوراعاسى بولىپ بەلگىلى مەملەكەت قايراتكەرى، سەنات دەپۋتاتى باقىتجان جۇماعۇلوۆ تاعايىندالدى.
جيىن بارىسىندا ورتالىق جانە جەرگىلىكتى مەملەكەتتىك ورگانداردىڭ جەتەكشىلەرى ءسوز الىپ، بەس الەۋمەتتىك باستامانى جۇزەگە اسىرۋداعى بۇگىنگى احۋال جانە باعدارلامانىڭ ورىندالۋىن باقىلاۋ جونىندەگى ارنايى مونيتورينگتىك توپ قۇرۋ جايىندا ايتىپ بەردى.
