«قازاقكونسەرت» مەملەكەتتىك كونسەرتتىك ۇيىمىنىڭ «استانا سازى» فولكلورلىق ءانسامبلى مەن مەملەكەتتىك «Forte trio» تريوسى يتالياداعى گاسترولدەن ۇلكەن جەڭىسپەن ورالدى، دەپ جازادى Qamshy.kz اقپارات اگەنتتىگى ق ر مسم باسپا ءسوز قىزمەتىنە سىلتەمە جاساي وتىرىپ.

«قازاقكونسەرت» شىعارماشىلىق ۇجىمدارى «رۋحاني جاڭعىرۋ» باعدارلاماسىنىڭ اياسىندا قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ قولداۋىمەن 2018 جىلدىڭ 26-30 ءساۋىر ارالىعىندا دج. روسسيني اتىنداعى XV حالىقارالىق مۋزىكالىق بايقاۋعا قاتىستى. اتاۋلى بايقاۋ يتاليانىڭ پەزارو قالاسىندا ءوتتى. 

قازاق ونەرىن لايىقتى دەڭگەيدە كورسەتە بىلگەن «استانا سازى فولكلورلىق ءانسامبلىنىڭ ارتيستەرى «حالىقتىق ورىنداۋ» نوميناسياسى بويىنشا ءبىرىنشى ورىنعا يە بولدى. يتالياندىق كورەرمەن قۇرمانعازى، كەتبۇعا، ىقىلاس، د.نۇرپەيىسوۆا، س.تۇرىسبەكتىڭ كۇيلەرىنە تامساندى. بۇل كۇيشىلەردىڭ تۋىندىلارىن ا.ورمانبەك، ن.ياكييەۆ، ا.وماروۆا دومبىرا مەن قوبىزدا ورىندادى.

تالانتتى مۋزىكانت م.ناربەكوۆ ۆيولانچەلدە كەرەمەت تۋىندىلاردى كورسەتىپ، «جەكە ورىنداۋ»، د.ميرمانوۆامەن بىرگە «كامەرالىق ورىنداۋ» نوميناسيالارىندا ءبىرىنشى ورىندى يەلەندى. كونسەرتتە يتالياندىق كورەرمەندەرگە اتاقتى ەۆروپالىق كومپوزيتورلاردىڭ، سونىڭ ىشىندە ي.س.باحتىڭ №2 سيۋيتاسىن، س.راحمانينوۆتىڭ ۆيولونچەل مەن فورتەپيانوعا ارنالعان سوناتاسىنىڭ III بولىگىن، ر.شۋماننىڭ «فانتاستيچەسكيە پەسى»، سونىمەن بىرگە «مويسەي ۆ ەگيپتە» تاقىرىبىندا ءتۇرلى تاماشا شىعارمالارى ورىندالدى. حالىقارالىق بايقاۋدىڭ قورىتىندىسى بويىنشا ۇزدىك شىققان ونەر شەبەرى م.ناربەكوۆ دج.روسسيني اتىنداعى ارنايى سىيلىقتىڭ يەگەرى اتاندى.

بايقاۋعا قاتىسۋدان تىس، «استانا سازى فولكلورلىق ءانسامبلىنىڭ شەبەر ورىنداۋشىلارى مەن «Forte trio» تريوسىنىڭ اتاقتى ارتيستەرى «گرادارا» كونە قامالىندا جەكە شىعارماشىلىق كونسەرتىن وتكىزدى. بۇل كونسەرتتە ەۋروپالىق كومپوزيتورلاردىڭ تۋىندىلاردان بولەك، قازاق فولكلورلىق مۋزىكاسىنىڭ عاجايىپ شەديەۆرلەرىن جانە ا.رايىمقۇلوۆانىڭ «Bridge of Times» كومپوزيسياسى سياقتى زاماناۋي قازاقستاندىق كومپوزيتورلاردىڭ دا تۋىندىلارى ورىندالدى. وتاندىق ارتيستەردىڭ بۇل ونەرى كورەرمەندەردى تامساندىرىپ قانا قويماي، قازاق ونەرىنە دەگەن قىزىعۋشىلىقتارىن وياتتى. مۋزىكانتتار ءبىزدىڭ ۇلتتىق ەرەكشەلىگىمىزدى حالىقارالىق مادەنيەتتى ورتادا ەلىمىزدىڭ ۇزدىك مۋزىكالىق شىعارمالارىمەن كورسەتە ءبىلدى.  

«قازاقكونسەرت» مەملەكەتتىك كونسەرتتىك ۇيىمىنىڭ جاسامپازدىق ۇجىمدارى ۇلتتىق مادەنيەتىمىزدىڭ شەتەلدەگى دەڭگەيىن كوتەرۋ ماقساتىندا الدا دا الەمدىك ارەنالاردى باعىندىرۋ نيەتتە. وسىنداي قازاقستاندىق ارتيستەردىڭ حالىقارالىق بايقاۋلارداعى ونەر كورسەتۋى قازاقستان رەسپۋبليكاسىنىڭ پرەزيدەنتى ن.نازاربايەۆتىڭ «جاھاندىق الەمدەگى زاماناۋي قازاقستاندىق مادەنيەت» اتتى جوباسىنىڭ جۇزەگە اسۋىنا ەلەۋلى ۇلەس بولىپ ەسەپتەلەدى