اقتاۋدا 6 مامىردا ساعات 17:00 شاماسىندا جوعالىپ كەتكەن 4 جاستاعى قايرات 16 ساعاتتان سوڭ تابىلدى، - دەپ xابارلايدى قازاقپارات.

4 جاستاعى قايرات تاڭعى 4:30 شاماسىندا ءوزى تۇراتىن ءۇيدىڭ 7-قاباتىنداعى پاتەرلەردىڭ بىرىنەن تابىلعان.

تۇرعىندار، ەرىكتى جاستار، بارلىعى 500-گە جۋىق ادام بالانى جابىلا ىزدەگەن بولاتىن. بالا جوعالىپ كەتكەن 22ء-ۇيدىڭ ماڭىنداعى ۇيلەر، بوس جاتقان جەرلەر، قوقىس جاشىكتەرى قارالعان.

ەرىكتىلەر سول ماڭداعى دۇكەندەردىڭ ءبىرىنىڭ بەينەكامەراسىنان 4 جاستاعى قايراتتىڭ ءوزى تۇراتىن ۇيگە كىرىپ، سودان شىقپاعانىن كورگەن.

كۋاگەرلەردىڭ ايتۋىنشا، تۇنگى 1-دەن باستاپ، 22ء-شى ءۇيدىڭ ءاربىر پاتەرىنىڭ تۇرعىنى شىعارىلىپ، پوليسەيلەر جەكە-جەكە ىزدەستىرۋ جۇمىستارىن جۇرگىزگەن.

7-قاباتقا كەلگەندە ءبىر پاتەر يەسى ەسىگىن اشپايدى. ءۇي يەسى جولداسىنىڭ سىرتىنان كىلتتەپ، جۇمىسقا كەتكەنىن ايتادى. اقىرى، ءۇي يەسى شاقىرتىلىپ، ەسىك اشىلادى. بالا سول پاتەردىڭ ىشىندە ەكەن. ءقازىر ءبۇلدىرشىننىڭ قالاي ول پاتەرگە كىرگەنى تەكسەرىلىپ جاتىر.