8 مامىردا وڭتۇستىك قازاقستان وبلىسى اكىمدىگىندە ق ر ۇكىمەت باسشىسىنىڭ ورىنباسارى، اۋىل شارۋاشىلىعى ءمينيسترى ءومىرزاق شوكەيەۆتىڭ توراعالىعىمەن القالى جيىن ءوتتى. ماجىلىستە وڭىردەگى اۋىل شارۋاشىلىعى جەرلەرىن سۋارۋ جانە شەگىرتكە زيانكەستەرىنەن قورعاۋ ماسەلەلەرى قارالدى. باسقوسۋعا وبلىس اكىمى ج.تۇيمەبايەۆ، ق ر اۋىل شارۋاشىلىعى ۆيسە-مينيسترى گ.يسايەۆا جانە مينيسترلىكتىڭ كوميتەت ءتوراعالارى مەن جامبىل، الماتى، قىزىلوردا، شىعىس جانە وڭتۇستىك قازاقستان وبلىستارىنىڭ اۋماقتىق ينسپەكسيا باسشىلارى، جەرگىلىكتى شارۋا قوجالىق يەلەرى قاتىستى.

جيىندا العاشقى بولىپ ءسوز العان ءو.شوكەيەۆ قازاقستاننىڭ گەوگرافيالىق ورنالاسۋ ەرەكشەلىكتەرىنە قاراي مەليوراسيالاۋ ماسەلەسى ءبىرىنشى كەزەكتە وڭتۇستىك وڭىرلەردە وزەكتى ەكەندىگىن جەتكىزدى.

«2017-2021 جىلدارعا ارنالعان اگروونەركاسىپتىڭ كەشەندى دامىتۋ باعدارلاماسىندا اۋىل شارۋاشىلىعى مينيسترلىگى اۋىل شارۋاشىلىعى داقىلدارىنان جوعارى جانە تۇراقتى ءونىم الۋ ءۇشىن جەر جانە سۋ رەسۋرستارىن پايدالانۋدى ارتتىرۋ ماقساتىندا ءتۇرلى شارالار كەشەنىن ۇسىندى. اتاپ ايتقاندا، گيدرولوگيا، توپىراق جانە اگروكليماتتىق جاعدايلارىن جاقسارتۋ»، - دەدى ءومىرزاق ەستاي ۇلى.

سونىمەن قاتار، ماجىلىستە مەليوراسيا جۇيەسىنىڭ مەملەكەتتىك باعدارلاما اياسىندا ىسكە اسىرىلۋى جانە ەلباسىنىڭ تاپسىرماسى اياسىندا يرريگاسيا جۇيەسىن قالپىنا كەلتىرۋ جانە 600 مىڭ گەكتار سۋارمالى جەردى اينالىمعا ەنگىزۋ بويىنشا وڭىردە الداعى ۋاقىتتا اتقارىلاتىن شارالار ءسوز بولدى.

وبلىس اكىمى ج.تۇيمەبايەۆ ايماقتاعى سۋارمالى جەرلەر كولەمى ۇلعايتىلىپ، جاڭا باعىتتاعى جوبالار بويىنشا دامىتىلىپ جاتقاندىعىن جەتكىزدى. ايتالىق، وڭىردە وتكەن جىلى 570،4 مىڭ گەكتار سۋارمالى جەردىڭ 498،2 مىڭ گەكتارى پايدالانىلعان.

سونداي-اق، بىلتىر وڭىردەگى اۋىل شارۋاشىلىعى سالاسىنداعى جالپى ءونىم كولەمى 522،4 ملرد. تەڭگەنى قۇراپ، وتكەن جىلدىڭ ءتيىستى كەزەڭىمەن سالىستىرعاندا 42 ملرد. تەڭگەگە ارتقان. سونداي-اق وزىق تەحنولوگيالاردى قولدانۋدا وڭتۇستىك قازاقستان وبلىسى رەسپۋبليكادا كوش باستاپ تۇر. ەلباسىمىزدىڭ تاپسىرماسىنا سايكەس، ايماقتا اۋىل شارۋاشىلىعى ونىمدەرىن ەكسپورتتاۋ جىلدان جىلعا قارقىندى وسۋدە.

باسقوسۋ بارىسىندا جەرگىلىكتى شارۋا قوجالىقتارىنىڭ ۇسىنىستارى تىڭدالدى. شارۋالار ماۋسىمدا ءتۇرلى تىڭايتقىشتاردىڭ باعاسىن باقىلاۋعا الۋ كەرەكتىگىن جانە وزىق تەحنولوگيالارعا ساي الىناتىن جابدىقتارعا بەرىلەتىن مەملەكەتتىك قولداۋلارعا وزگەرىستەر ەنگىزۋى قاجەتتىگىن، سونداي-اق سۋارمالى جەرلەرگە سۋدىڭ كەرەكتى مولشەردە كەلۋىن قامتاماسىز ەتۋىن سۇراندى.

ق ر اشم سۋ رەسۋرستارى جونىندەگى كوميتەتتىڭ ءتوراعاسى يسلام ابىشيەۆ شارۋالار ساۋالدارىنا جاۋاپ بەرىپ، ۇسىنىستار مينيسترلىك تاراپىنان شەشىمىن تاباتىنىن جەتكىزدى.

سونىمەن قاتار، جيىندا شەگىرتكە زيانكەستەرىمەن كۇرەسۋ جۇمىستارى تالقىلاندى. ءۇيىرلى شەگىرتكەگە قارسى جۇمىستار وڭتۇستىك وڭىرلەردە اعىمداعى جىلدىڭ 10 ساۋىرىنەن باستالعان. وڭتۇستىك قازاقستان وبلىسىندا ماروككو شەگىرتكەسىنە قارسى كۇرەس شارالارى بويىنشا جوسپارلانعان اۋماقتىڭ 1/3 بولىگى وڭدەلگەن. وڭىردە بيىل ءۇيىرلى شەگىرتكەلەرگە قارسى زەرتتەۋ جۇمىستارى 1 ملن. 573 مىڭ گەكتار اۋماققا جۇرگىزىلسە، حيميالىق وڭدەۋ ءىس-شارالارى 350 مىڭ گەكتارعا جاسالعان.

ق ر اشم اگروونەركاسىپ كەشەنىندەگى مەملەكەتتىك ينسپەكسيا كوميتەتىنىڭ ءتورايىمى اجار ەلەمەس قىزى شەگىرتكەگە جانە ولاردىڭ تارالۋىنا مونيتورينگ جۇرگىزۋدى ناقتى باقىلاۋ ءۇشىن GPS ترەكەرلەر مەن GPS ناۆيگاتورلار قولدانىلاتىن ايتتى. ولار رەسپۋبليكا اۋماعىنىڭ فيتوسانيتارلىق جاي-كۇيىن، ونىڭ ىشىندە وڭىرلەردەگى شەگىرتكەلەر بويىنشا ناقتى كورىنىسىن كورسەتەتىن بولادى.