بۇگىن جەڭىستىڭ 73 جىلدىعىن اتاپ ءوتۋ ءراسىمى اياسىندا استانا قالاسىنداعى «وتان قورعاۋشىلار» مونۋمەنتىنە گۇل شوقتارىن قويۋ ءراسىمى ءوتتى، دەپ حابارلايدى استانا قالاسى اكىمدىگىنىڭ رەسمي سايتى.
سالتاناتتى شاراعا ۇكىمەت باسشىسى باقىتجان ساعىنتايەۆ، سەنات ءتوراعاسى قاسىم-جومارت توقايەۆ جانە ءماجىلىس ءتوراعاسى نۇرلان نىعماتۋلين، پرەزيدەنت اكىمشىلىگىنىڭ باسشىسى ادىلبەك جاقسىبەكوۆ، مەملەكەتتىك جانە قوعام قايراتكەرلەرى قاتىستى.
«مەنىڭ اكەم II بەلارۋس فرونتىندا سوعىستى. ونى 1942 جىلدىڭ قاڭتار ايىنشا اسكەرگە شاقىرعان. 1944 جىلى پولشا جەرىندە جاراقات العان. مەنىڭ كوكەم – قاسىم بولتايەۆ، تۆەر وبلىسىنىڭ رجيەۆ اۋدانى ترۋبينو اۋىلىندا جاتىر، رجيەۆ ءۇشىن بولعان شايقاستا قازا تاپقان»، - دەدى سەنات ءتوراعاسى قاسىم-جومارت توقايەۆ.
سوعىس ارداگەرلەرى، قالا تۇرعىندارى مەن قوناقتارى سۇراپىل سوعىستا قايتىس بولعانداردى ءبىر مينۋتتىق ۇنسىزدىكپەن ەسكە الىپ، «ماڭگىلىك الاۋعا» گۇل شوقتارىن قويدى.
«مەنىڭ ويىمشا قازاقستاننان بۇل سوعىسقا قاتىسپاعان وتباسى جوق شىعار. بۇل مەرەكە ءبىزدىڭ ەل ءۇشىن وتە زور مانگە يە. بۇل كۇن ءبىزدىڭ اتالارىمىزدىڭ ەرلىك كورسەتىپ، جەڭىسكە جەتكەن كۇنى»، - دەدى «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ.
مونۋمەنت الاڭىندا اسكەري پالاتكالاردان قالاشىق قۇرىلىپ، اردەگەرلەر مەن تىل ەڭبەككەرلەرىنە ارنالىپ مەرەكەلىك داستارحان جايىلدى.
«ءبىز كەنيگسبەرگكە جەتكەندە جەڭىسكە جەتتىك دەگەن حابار جەتتى. حالقىمىز بار قيىندىققا قاراماستان جەڭىسكە جەتتى. ءبىز وزىمىزگە جۇكتەلگەن مىندەتتى ابىرويمەن اتقاردىق، ەندى سىزدەردىڭ مىندەت ەلىمىزدىڭ كوركەيۋىنە ەڭبەك ەتىپ، دوستىعىمىزدى جالعاستىرا بەرىڭىزدەر. حالقىمىزدىڭ دوستىعى ماڭگى بولسىن»، - دەدى ماسكەۋدەن كەلگەن ارداگەر پەتر سولوماتين.
«وتان قورعاۋشىلار» مونۋمەنتىنىڭ جانىنداعى «پارۋس» ساحناسىندا استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ جانە م. گوركيي اتىنداعى مەملەكەتتىك اكادەميالىق ورىس دراما تەاترىنىڭ ارتىستەرى ونەر كورسەتتى.
مەرەكەلىك كونسەرتتىك باعدارلامالار «ستۋدەنتتەر ساياباعىندا» جالعاسادى، وندا ەلوردانىڭ جەتەكشى شىعارماشىلىق ۇجىمدارى اسكەري اندەر شىرقايدى.
پىكىر قالدىرۋ